ग्व गबलय् वइ माधवया सरकार ?

दिलिप शाही 'शान्तियज्जु’

लछि तकया लगातार कुतः लिपा बल्लबल्ल पूर्णता कायेत्यंगु माधव नेपालया सरकार म्हिगः हानं छक्वः असफल जुल । म्हिगः वय्कलं तयार याःगु शपथ ग्रहण ज्याझ्वलय् कांग्रेस व एमालेया मन्त्रीत जक दुथ्यात मधेशवादी पार्टीत अझ नं दुहां मवःनि । सरकारयात पूर्णता बी मफयाः हीमी चायाच्वंम्ह प्रधानमन्त्री माधव नेपालया हीमी म्हिगःया घटनां अझ थहां वन जुइ । म्हिगः नं मधेशवादी पार्टीत दुहां मवःगु कारणं सम्भवतः आः वय्कःया हे थःगु सरकार ताःहाकः न्ह्याइ धइगु खँय् विश्वास मदया वनाच्वंगु दयेमाः ।

भाजु माधव नेपाल न्हापा नं प्रधानमन्त्री जुइगु धलखय् तःक्वः लायेधुंकूम्ह खः । तर प्रधानमन्त्रीया चर्चा जूसां नं वय्कः प्रधानमन्त्री जुइगु भाग्य धाःसा गण- तान्त्रिक कालय् वयाः जक चूलात । प्रधानमन्त्री जुइगु लागिं बहुदलीय कार्यकाल व जुजु ज्ञानेन्द्रया कार्यकालय् नं वय्कलं कुतः मयाःगु मखु । तर उगु इलय् वय्कःयात भाग्यं जक साथ मबिउगु मखु जुजु ज्ञानेन्द्रं नं पत्याः नं पत्याः मयात । आः ज्ञानेन्द्रया अन्त्य लिपा बल्लबल्ल वय्कःयात थ्व अवसर वयाच्वंगु दु ।

तर सरकारय् वःसां नं सरकारयात पूर्णता बीत धाःसा वय्कःया निंतिं नँया बजि न्ह्यये थें जुयाच्वंगु दु । वय्कः कांग्रेस सभापति गिरिजाप्रसाद कोइरालाया आर्शिवादं जक प्रधानमन्त्री जुइ खंगु दु । तर कोइरालाया आशिर्वाद गबलय् तक दइगु खः उकिया धाःसा छुं ठेगान मदु ।

मेता खँ सरकार गठन यायेगु झ्वलय् गुगु कथं राजनीतिक तिकडम म्हितेमाःगु खः उकिं यानाः प्रधानमन्त्रीयात धाःसा हाकनं हाकनं छ्यं स्याइगु स्थिति ब्वलनीगु नं निश्चित दु । छखे माधव नेपालयात प्रधानमन्त्री दयेकेगु झ्वलय् मधेशी जन- अधिकार फोरम निकू कुचा जूगु दुसा मेखे सरकारय् ब्वति कायेत तयार जूगु 'हाफ' फोरमं नं थःपिंसं धाःगु मन्त्रालय मबिउ धकाः आः तक सरकार 'ज्वाइन' याः वःगु मखुनि । अझ जिउसा गुगुं नं इलय् वं सरकारयात बियातःगु समर्थन लित तकं काये फुगु अवस्था दु । थज्याःगु कमजोर धरातलय् च्वनाः नेपालं गुकथं सरकार न्ह्याकी व धाःसा आम चिउताःया विषय जुयाच्वंगु दु ।

छखे ताः ई तक नं सरकार गठन याये मफयाः प्रम नेपालया न्ह्यः स्यनाच्वंगु दुसा मेखे सरकारयात पूर्णता बी मफुगु हे कारणं यानाः देय्या छबि नं अन्तर्राष्ट्रिय रुपं धुमिल जुजुं वनाच्वंगु दु । ख ला एमाले पार्टी धइगु हे आः छगू अज्याःगु गाइजात्रे पार्टी जुइधुंकूगु दु गन इज्जत प्रतिष्ठा सिद्धान्त आदिया छुं हे मू मदु । पार्टीयात थ्व अवस्थाय् थ्यंकेगु ज्याय् मू नायक जुयादीम्ह प्रम माधव नेपालं छखे थःगु हे पार्टीया सभासद्तय् पूर्ण विश्वास कायेफुगु मदुनिसा मेखे पार्टी दुनेया थीथी गुटयात लय् तायेकेत नं वय्कः ताःलाःगु मदुनि । थज्याःगु गाजागोलय् लानाच्वंगु माधव सरकारया आयु गुलि खः

म्हिगः च्वंगु एमाले संसदीय दलया बैठकयात जक दुवालेगु खःसां नं यक्व खँ स्पष्ट जुइ । संसदीय दलया बैठकय् सभासद्तय्सं गुगु द्वपं प्रधानमन्त्री नेपालयात बिल थ्व तसकं गम्भीर खः । थःगु हे पार्टीया संसदीय दलया दुजःतय्सं राष्ट्रपतिया पलाःयात कयाः गुगु आलोचना यात अले उकिया लिसः प्रमं म्हिगः गुकथं बियादिल थुकिं स्पष्ट जू नेपाल सरकारया धरातल छु खः

स्वय्म थःगु हे पार्टीया सभासद्तय्सं प्रधानसेनापति प्रकरणय् राष्ट्रपतिया पलाःयात कयाः गुगु विरोध प्वंकेगु ज्या जुल लिसें नेतृत्व पंक्तिं सरकारय् वनेगु निंतिं राष्ट्रपतियात बिन्ति पत्र तःगु थेंज्याःगु द्वपं बीगु ज्या यात थ्व तसकं गम्भीर खः । तर थुकियात कयाः प्रधानमन्त्रीं बियादीगु लिसलं धाःसा एमालेया नेतृत्व आः तर्क व सिद्धान्तया ल्याखं नं ताथ जुइधुंकूगु खः ला धकाः शंका यायेमाःगु अवस्था पिकया बिउगु दु ।

लोकतन्त्रय् जनता सर्वेसर्वा जुइ थ्व लोकतान्त्रिक मान्यता खः । तर लोकतान्त्रिक मान्यतायात एमालें आत्मसात याये मफुगु द्वपं थःहे कार्यकर्तापाखें वयाच्वंगु दु । तर नेपालं प्रधानमन्त्री जुइगु निंतिं अज्याःगु द्वपंयात नं मखंछु यानादिल ।

प्रधानसेनापति प्रकरण माओवादीया निर्णय जक धकाः तायेके मजिउ धइगु थौंया खँ खत । थुकी दुने सुलाच्वंगु यक्व खँत आः तक पिहां मवःनि अले गुगु इलय् पिहां वइ उगु इलय् देशया राजनीति मेगु दिशाय् वनीगुपाखे नं थौं बिचाः यायेमाःगु खः । तर एमालें थुखेपाखे ध्यान मबियाच्वंगु द्वपं नं स्वय्म एमालेया सभासद्तय्सं बीगु यानाच्वंगु इलय् रथी कुलबहादुर खड्कायात सम्मानजनक रुपं विदाइ यायेगु धकाः प्रम नेपालं गुगु धाल थुकिं झन जक राजनीतिक संकटयात तजाः याइगु सम्भावना ब्वलंका बिउगु दु ।

माओवादीं राष्ट्रपतिया पलाः भिंकेगु ज्या मयाःतले संसद न्ह्याके मबीगु धयाच्वंगु इलय् प्रधानसेनापतियात वैधानिकता बीगु धायेगु धइगु राष्ट्रपतिया असंवैधानिक पलाःयात वैधानिकता बीगु धायेगु थें जुइ । अथे धइगु देशय् दोहोर शासन प्रणाली हावी जुइगु निश्चित दु । अले गिरिजायात माधव नेपाल मययेसाथ हाकनं अज्याःगु हे पलाः राष्ट्रपति मार्फत गिरिजां ल्ह्वनीगु निश्चित दु ।

छु थज्याःगु धरातलय् च्वनाः माधव नेपालं सरकार न्ह्याके फइ ला थौंया आवश्यकता माओवादीयात नं साथ कयाः राजनीतिक निकासा मालेमाः धकाः स्वय्म एमालें धयाच्वंगु इलय् माओवादीया मागयात ध्याक्वय् तयाः सरकार चले यायेगु धइगु तिन्हिलय् म्हगस म्हंकेगु ज्या जुइ ।

खय्त ला पदया निंतिं न्ह्यागु नं यायेत लिफः मस्वइगु एमाले थेंज्याःगु पार्टीया सभासदतय्सं थः हे नेताया गलत कि्रयाकलापयात कयाः गुगु कुंखिनेगु ज्या यात उकियात धाःसा च्वछाये हे माः ।

More Stories Like this