येँय् न्हिनय् हे पेस्तोल क्यनाः १५ लाख लुटे यात
येँ / (सन्ध्या टाइम्स) राजधानी येँय् थौं तिन्हिनय् हे लँय् वयाच्वंम्ह छम्ह मनूयात पेस्तोल क्यनाः १५ लाख तका स्वयां अप्वः दां लुटे याना यंकूगु दु ।
थनया बुरांख्यः व ताम्सिपाखा कुहां वनेगु स्वदुवातय् लाक्क मोटरसाइकल गयाः वयाच्वंम्ह उदय राणायात उकथं पेस्तोल क्यनाः लुटे याना यंकूगु खः । राणा थ्व दां ज्वनाः ठमेलया पोताला गेष्ट हाउसं वःम्ह जुयाच्वन । वयात गेष्ट हाउसंनिसें हे निम्ह मनूतय्सं न्ह्यःनेया नम्बर सी मदुगु ९७३२ नम्बरया पल्सर मोटरसाइकल गयाः पीछा यानाः वयाच्वंगु लानाच्वन । बुरांख्यःया उगु दुवातय् थ्यनेसातकि उमिसं आकाझाकां मोटरसाइकल क्रस यानाः न्ह्यःने दिकुसें राणाया लँ पन । राणाया मोटरसाइकल दीसातकि उमिसं वयाके च्वंगु ध्यबाया ब्याग सालेगु कुतः यात । तर राणां ब्याग मबिउ । वयांलि उपिं निम्हेस्यां पेस्तोल लिकयाः वयात सोझे यात । अन्तिमय् बाध्य जुयाः राणां ध्यबा दुगु ब्याग उमित लःल्हाना बिल । ब्यागय् १५ लाख २६ हजार तका दां पासपोर्ट व मेमेगु महत्वपूर्ण भ्वं दुगु खँ धाःगु दु ।
ब्याग ल्हातय् लायेवं उमिसं राणां हानं थःपिंत पीछा याः मवयेमा धकाः वयागु मोटरसाइकलया ताःचा लिकयाः वांछ्वया बिल । राणा उगु इलय् थः कलाः सरीता राणा सहित बा. अ. १५ प. २०६९ नम्बरया चाइनिज मोटरसाइकलं वयाच्वंम्ह खः ।
थःपिंत लुट यायेधुंकाः राणा थः कलाःयात घटनास्थलय् तुं तयाः थः चाहिं पैदल हे हनुमानध्वाखाय् वनाः प्रहरीयात खबर बिउवंगु खः । लिपा प्रहरी वयाः अन घटना बारे जानकारी काल ।
घटना थौं न्हिनय् करिब १२-३० बजेपाखे जूगु खः । घटना जूगु खंपिं स्थानीय मनूतय्सं धाः कथं लुटेरात निम्हेस्यां पेस्तोल क्यंगुलिं अन छुं हिंसा हे जुइगु खः लाकि धइगु समेत ग्याःचिकु जुइधुंकूगु खः ।
मय्जु राणां जानकारी बिउ कथं उपिं स्वयम्भु किंडोलय् च्वंपिं खःसा उमिसं ब्यापार यायेगु लागिं थ्व ध्यबा ज्वना वःगु खः । लुटेरात वँचुगु रंगया मोटरसाइकल गयाः वःगु खःसा उमिसं जिन्स पाइन्ट न्ह्यानातःगु खः । ध्यबा लुटे यानाः उपिं उत्तर स्वयाः बुरांख्यःपाखे बिसिउँ वंगु खँ धाःगु दु । आः प्रहरीं उमित मालाच्वंगु दु ।
