सच्चापिं नेतात जन्मे हे मजूनि

झीथाय् नेपालय् शुद्ध व भिंपिं नेतात जन्मे हे मजूनि । चाहे माओवादी पार्टी जुइमा चाहे एमाले काँग्रेस फोरम न्ह्यागु हे पार्टी जुइमा देशया लागिं अयोग्य स्वार्थी बाहेक देश विकास यायेगु तातुनाः नेता जूवःपिं छम्ह हे मदु । देशया विकास याःवःपिं मखु विनाश याःवःपिं खः नेतात ।
आः हे स्वरे माधवकुमार नेपाल प्रधानमन्त्री जूगु प्यवाः दयेधुंकल अझ नं मन्त्रिमण्डल गठन यायेफुगु मखुनि । पार्टी दुने नं पदया लागिं थवंथवय् खिचा ल्वाः थें ल्वानाच्वंगु दु । थज्याःपिं नेतातय्सं छु देश दयेका नइ भाषण जक बीसःपिं ब्रम्हू नेतात ज्या यानाः नईपं मखु । नेपाःया जनता थौं तसकं दुःख सियाच्वन । थःगु देसय् ज्या मदयाः विदेशय् वनाः ज्या याः वने मालाच्वंगु दु । सःसिउपिं मनूत धमाधम विदेश पलायन जुयाच्वंगु दु । देशय् न्ह्याबलें अशान्ति नापं जनतां गुलि दुःख सियाच्वंसां पार्टीया नेतातय्के चिउताः मदु । नेतात सत्तँय् च्वनाः कुर्सीइ फ्यतुइ मखनी धकाः जक धन्दा । उकिं थन नेपालय् सच्चापिं शुद्धिपं नेतात जन्मे मजूनि ।

प्रेमबहादुर बज्राचार्य 'लुबंजाः',
केलत्वाः, येँ ।

More Stories Like this