शानदार मन्त्रालय

रत्नकाजी शाक्य 'करोडपति'

शानदार थ्व शब्द हे शानदार । अझ शानदार मन्त्रालय धायेबलय् हाइँ नेतातय् ई हे चुक चुक वनी । थ्व मन्त्रालय काये खनीबलय् उमिगु शान मान सुनां स्वइ ? आः थ्व गुगुपत्ति मन्त्रालय गुगु विभाग धकाः न्यनादी हे मते । शानदार मन्त्रालय याने शानदार ममः धाये थें खः । शानदार ममः नां कायेबलय् झीगु न्ह्यःने ति हे झ्वाल्ल वइगु थत्थाय्ग्वःगु ममः खनेदयेकः वइ । आः ममःयागु आन्द्रा भुँडी छु कनेगु आन्द्रा भुँडी तयाः हे दयेकीगु खः । थ्व नं शहिदतय्गु आन्द्रा भुँडी जनताया हि-चःति ल्वाकछ्यानाः दयेका तइगु मःमः भ्रष्टाचारया अचार व कमिशनया सुप नापं नयेनंपिं नेतातय्सं ज्यान हे पाइ थ्व नयेत छिकिपंसं खना हे दिल जुइ गच्छदारं गद्दार याःगु नेतातय्सं देश जनता पार्टी हे धाइ मखु । फोरम हे झारमझुरुम छ्यों छ्यों फोरे यानाः फोरे जुल सरकारयात कोरम हे मगाइ कथं । एक मधेश एक प्रदेश धाईपं हे निकू कुचा जुल । निगू कुचा जुयाः एक मधेश एक प्रदेश जूवन धाये माली का ।

थज्याःगु ममःयागु सवाः थूम्ह गिरिजां शानदार आइटम ममः थः म्ह्याय् सुजाताया प्लेटय् काचाक्क तया हे बिल । आइटम ममः याने आइटम मन्त्रालय सिनियोरिटी धकाः बुराबारापिं तयेगु नं खँ पिहां वइ मखु । हानं सुजाताजी थः अबु प्रधानमन्त्री जूगु इलय् अबु नापं यक्व देश चाःहिलेगु अनुभव नं दुम्ह खः । परराष्ट्र मन्त्रालय वय्कःयात ल्वःगु हे खत । राजनीतिइ सु जाता सु आता अबु व म्ह्याय्या नाता । सत्ताया महिमा मदु अत्ता पत्ता । सुशील कोइराला रामचन्द्र पौडेलजी डन्ट वरी गिरिजाया छोरी ।

झी हालाच्वने आः तक सुं हे स्थिर सरकार मवल । पुरा कार्यकाल न्यादँ तक सुं हे मच्वन । तर अस्थिर सरकार जुलं हे उलिया दुने न्हय्गू पुस्तायात गाक्क सम्पत्ति मुंके धुंकी धाःसा न्यादँ तक पुरा च्वनीबलय् ग्वःगू पुस्तायात गाक्क मुंकीगु जुइ ओहो ! कल्पना हे यानादीमते । अस्थिर हे ठिक जू ।

सिमा मरुथाय् अलःमा नं सिमा
निथासं बूम्हेसित प्रधानमन्त्री बीमाः
नेतातय्त कुर्सी माः
अन्याय अत्याचारया मरु सीमा
भारतं मिचे यानाच्वन सीमा
अय्सां वहेपति लीमाः
कल्पवृक्षँ मखु विषया सिमा
गुम्हेस्यां चुनाव चिं हे सिमा
द्वहं द्वहं ल्वानाः जनता जुयाच्वन किमा
धयाच्वन शानदार मन्त्रालय जिमित हे बीमाः
बेसाः भावं आकासय् थीमा
जनता नये मखनाः थसीमा
अपरम्पार ममः महिमा

थथे ममःयागु भागबण्डा आः तकं क्वमचाःनि । जितः थ्वःगः हे माः जितः वःगः हे माः धाधां ममः हे ख्वाउँइ लाः । ग्व स्ववालं मयाये धुंकल माधवया सरकारं पूर्णता काये मफुनि । थ्व नं सरकार टिके यायेगु हे टिकडम जकं खः लाकि बुंगद्यः जनताया द्यः जनमहाद्यःया रथ दयेकीपिं ठेकेदारतय्सं ध्यबा नयाः लाःलाः थें दयेकीबलय् रथ क्वः दइ थें सरकार नं हस्ते हैंसे धाये मलाक हे क्वःदलीगु खः ला निथासं हार जूसां गपाय्माःगु स्वांया हार क्वखायेकूगु झीसं पत्रिकाय् खनागु हे खः । सुयागु हारगुहारं सरकार बने जूगु खः अय्सां गन्थन नं सिमधःनि पुरा गठन नं मजूनि । माओवादीत स्व गपाय्सकं हथाय् चाःगु भचा हे पी मलाःगु । ममः हे बुइ मलाःनि सिंहदरवारं पिहां वल । आः चक्का जाम यानाः छु याये सरकारय् छक्का जाम जुजुं वनाच्वंगु दु । हालीपिंत सिंहदरवारय् भुले यानातःगु ला खः आः हानं कालाकुलुं सः तायेदत । जंगलय् च्वंपिं हिसाबय् भतिचा कमजोर जुइगु स्वभाविक हे खः ।

अँ नेतातय् ममः पार्टी धुमधाम नक्सां न्यायेकाच्वंगु दु । भारतया अय्लाः अमेरिकन ह्विस्की बिना रिस्किं तिल्ल जुयाच्वंगु दु । थज्याःगु हालतय् गज्याःगु हालतगु संविधान च्वइगु खः । संविधान च्वइगु कापीइ हे न्हुत्तुन्हुयाच्वंगु दु । वहे ह्विस्की अय्लाखय् थुनाः च्वइगु खः ला होश दुगु हे मखु । थज्याःगु ममः पार्टी त्वःताः छु च्वइ संविधान छिकिपंसं हे धयादिसँ ।

More Stories Like this