ख्वपय् नं शुरु जुल फोहोरया समस्या

ख्वप नगरपालिकाया मू आयश्रोत पर्यटन सेवा शुल्क खः । आः थःपिनि मू आयश्रोत जुयाच्वंगु पर्यटन सेवा शुल्कयात निरन्तरता बीगु निंतिं नगरपालिकां थीथी ज्याझ्वःत पित हयाच्वंगु दु । थ्व झ्वलय् पर्यटकतय्त ख्वपय् चाःहिउ वयेगु वातावरण दयेकेगु हे नगरपालिकाया मू हाथ्या जुयाच्वंगु दु । उकिया निंतिं आः त्वाः त्वालय् हे फोहोर उत्पादन म्हो यायेत उत्प्रेरकत तयार यानाः उमिपाखें छेँय् छेँय् वनाः सफाई अभियान न्ह्याकेगु तयारी यानाच्वंगु दु । उकिया निंतिं न्हापांगु ज्याझ्वः कथं ख्वप इन्जिनियरिङ कलेजय् निन्हुयंकं फोहोरमैला व्यवस्थापन तालिम क्वचाये धुंकूगु दु ।

कम्पोष्ट साः उत्पादन व सितिं वंगु सामान हाकनं छ्यलाः बजारय् पिहां वइगु फोहोर म्हो यायेगु ल्याखं ख्वप नगरपालिका स्यानिटेशन शाखापाखें वडा नं-२, ४, ८, १४ व १७ या नीनिम्ह ल्याय्म्ह उत्प्रेरकतय्त उगु तालिम बिउगु खः । ख्वप नगर जनप्रतिनिधिविहिन जुसांनिसें फोहोर जुजुं वनाच्वंगुलिं तालिमया ग्वसाः ग्वयागु खँ नगरपालिकाया स्यानिटेशन शाखा प्रमुख दिलीप कुमार सुवालं कनादिल । नगरपालिकाया हे समाज कल्याण शाखा प्रमुख मोतिभक्त श्रेष्ठं फोहोर प्रति न्हियान्हिथं नगरवासीतय् चिउताः अप्वया वनाच्वंगुलिं फोहोर तह लगे यायेगु उपाय व कम्पोष्ट साः दयेकेगु नापं नगर सफा यानाः ख्वपयात पर्यटकीय गन्तव्यस्थल दयेकेगु योजना दुगु खँ कनादिल ।

ख्वपय् २०१९ सालंनिसें हे छगू जक राजनीतिक धारया मनूत नगरपालिकाया बोर्डय् त्याना वयाच्वंगु दु । अथे जुयाः उगु राजनीतिक धारं छु निर्णय यात उकियात लागू यायेत अःपुया नं च्वंगु दु । सम्पदा संरक्षण व सफाई थेंज्याःगु ज्याय् मेमेगु राजनीतिक दलपाखें प्रतिनिधित्व यानावःपिंसं नं खास दुःख बीगु ज्या धाःसा यानाच्वंगु मदु । अथे जुयाः हे थ्व नगर एशियाया नमूना शहर दयेकेगु धकाः २०५४ सालय् जूगु निर्वाचनया इलय् नेमकिपां याःगु प्रतिवद्धता छुं छुं पूवंगु खः । प्रेम सुवाल नगरपिता जुइधुंकाः थुगु नगरयात एशियाली स्तरय् हे उच्च स्तरया युनेस्को सिरपाः नं लाःगु खः । थ्व नगर सफा जूगु व नगरवासीतय्सं सफाई अभियान न्ह्याकेत याना क्यंगु ग्वाहालिया हे लिच्वः खः ।

२०३९ सालय् त्यानावःगु ज्ञानबहादुर न्याइच्याईया नेतृत्वय् चले जूगु नगरपालिका बोर्डं थ्व नगरयात सफा नगर दयेकेगु निंतिं त्वाः त्वालय् सफाई मजदूरत तयार याःगु जक मखुसें मेयर उपमेयर नापं फुक्कं वडा अध्यक्षत हे त्वाःत्वालय् वनाः बँ पुइगु अभियान न्ह्याकूगु खः । सफा यायेगु धइगु मछालापुसेच्वंगु ज्या मखु धकाः थुकिं न्हूगु सन्देश नं बिल । खय्त ला थथे न्हापां त्वाःत्वालय् ज्यापुतय्त हे सफाई मजदूर दयेकाः ज्या याकूगु इलय् किजापूजाया कु तकं दुमकायेगु वा सामाजिक बहिष्कार यायेगु ज्या नं छम्ह निम्ह सफाई मजदूरतय्सं भोगे मयाःगु मखु । तर ताः ई तकं नगरपालिकां थुगु अभियानयात निरन्तरता बीवं धाःसा आः छगू जातय् सीमित जुयाच्वंगु फोहोर सफा यायेगु ज्या नगरबासी थः हे मिले जुयाः व थ्व मधासे न्ह्याकाच्वंगु दु ।

फोहोर व्यवस्थापन अथें हे थाकुगु विषय खः । येँ यलय् नं उकिया विकराल समस्या दु । आः वयाः ख्वपय् नं न्हापा ढुक्क जुयाः फोहोर वांछ्वयाच्वंगु थाय् भिंद्यइकेय् स्थानीय जनतां धू वाके मखु धकाः धर्ना च्वनेगु शुरु यायेवं धाःसा ख्वपय् नं समस्या ब्वलंगु दु । भिंद्यइके फोहोर वाइगु इलय् अन ७, ८, ११ व १२ वडाया मनूतय्त तसकं हे च्वने थाकु । नापं न्हापांनिसें सफाई हे लजगाः कथं कयाच्वंपिं ११ वडाया प्वःतय्त नं थुकिं मछिनाच्वंगु खँ नगरपालिकां मसिउगु मखु । थ्वहे थीथी कथंया मिछंपहःयात आः छगू छगू यानाः ज्यंका वनेगु अभियान कथं नगरपालिकां त्वाःत्वालं वइगु फोहोर हे म्हो यायेगु अभियान न्ह्याकेमाःगु खँ पुलांम्ह मेयर प्रेम सुवालं धायेगु यानादी ।

More Stories Like this