पारपाचुकेया मारय् नेपाली हिरोनीत

नरेन्द्रमान श्रेष्ठ 'गोंगजु'

नेपाली फिल्म लागाय् हिरोनीतय् पारपाचुके धइगु आः सामान्य थें जुइधुंकल । इलय् ब्यलय् कलाकारतय् स्वापू त्वाःदःगु खँ पिहां वइ । लिपांगु इलय् ला थुकी भचा लहर हे वल धाःसां जिउ । गुलिखे कलाकारतय् पारपाचुकेया खँ चर्चाय् वइसा गुलिस्यां गुपचुप जुया वनी । नकतिनि टिभी हिरोइन सीमा ढकालया पारपाचुके जूगु खँ पिहां वल । टेलिफिल्म निर्देशक बाबुराम ढकालनाप ब्याहा याःम्ह कलाकार सीमा पनेरु पारपाचुकेया नापनापं नेपाल टेलिभिजनं प्रशारण जूगु 'माइती' पाखें नं अलग जुइ माल । 'माइती'या निर्देशक स्वयम् बाबुराम ढकाल खः । हिन्दी टेलिफिल्म दयेकीगु नांजाःगु कम्पनी बालाजी फिल्म कम्पनीइ सहायक निर्देशक जुयाः ज्या याना वयेधुंकूम्ह बाबुराम ढकालं 'खुशी पलभरको' निर्देशन यायां हे उकिया हिरोइन सीमा पनेरुलिसे ब्याहा याःगु खः ।

पाय्छि उकथं हे टेलिसिरियल 'गहना' या निर्देशक श्याम भट्टराई व उकिया कलाकार रंजना शर्मा दथुइ नं शुटिङया इलय् मतिना जुयाः ब्याहा जूगु खः गुगु आः वयाः त्वाःदःगु दु । श्याम भट्टराईनाप ब्याहा यानाः तःधंगु पर्दाया फिल्म 'मर्यादा' व 'मौशमय्' हिरोनी जुइखंम्ह रंजना शर्मा व श्याम भट्टराईया तिपू जीवन स्वदँ हे न्ह्याये मफुत । खास यानाः न्ह्याबलें विवादया कारणं चर्चाय् वयाच्वनीम्ह हिरो भुवन केसी व रंजना शर्माया स्वापू बारे 'जनआस्था' वाःपती समाचार पिहां वयेवं उमि दथुया स्वापू स्यना वंगु खः । उगु समाचार पिहां वयेवं भुवन केसींला 'जनआस्था'या पत्रकारयात स्याना हे बी धकाः ख्याच्वः नं बिल । तर ख्याच्वः बीवं धाथें जूगु खँ फय्गं साबित जुइगु ला मखु । खँयात थुकिं झन् हे स्यंका बिल ।

नेपाली फिल्म ख्यलय् कलाकारतय् पारपाचुके न्हूगु खँ चाहिं मखु । पुलांगु फिल्म 'सन्तान' या हिरोनी गौरी मल्लं नं भाःतनाप पार कायेधुंकूगु दु । अथे गौरीया समकालीन हिरोनी मौसमी मल्लं कलाकार भाःत धन विक्रम मल्लनाप स्वापू त्वाःथलाः छपाई व्यवसायी रवि डंगोलनाप निक्वःगु ब्याहा याःगु खः । आः थ्व स्वापू नं त्वाःथलाः याकःचा हे फिल्मय् व्यस्त जुयाच्वंगु दु । अथे ईश्वर जिन्दगानी खेलौना चाहन्छु म तिमीलाई थेंज्याःगु फिल्म व टेलिफिल्मय् म्हितेधुंकूम्ह हिरोनी पुजा चन्द नं भाःतलिसे स्वापू त्वाःथलाः आः अमेरिकाय् च्वनाच्वंगु दु ।

मेम्ह लोकंह्वाःम्ह हिरोनी संचिता लुइँटेल व आकाश शाहया न्हय्दँ ताःहाकःगु तिपू जीवन त्वाःदलेवं फिल्म ख्यलय् तःधंगु हे चर्चा जुल । अथे हे फिल्म पाकेटमारया हिरोनी सोनीया मल्ल व दिनेश शर्माया स्वापू नं त्वाःदःगु खः ।

नेपाल टेलिभिजनं प्रशारण जुयाच्वंगु लोकंह्वाःगु टेलिसिरियल 'तीतो सत्यं' चर्चाय् वःम्ह कलाकार शुष्मिता कार्की व रोशन पराजुलीया स्वापू नं निदँ लिपा हे त्वाःदल । अथे हे टेलिसियल 'पुरुष'य् अभिनय यानाः चर्चाय् वःम्ह हिरोनी सौजन्य सुब्बा नं भाःत सरोज घिमिरेलिसे सम्बन्ध विच्छेद जूम्ह खः । ब्याहाया निदँ लिपा हे उमिगु स्वापू त्वाःदःगु खः ।

छगू इलय् नेपाली टेलिसंसारया कोमोलिका धकाः चर्चाय् वःम्ह पि्रया रिजालया नं भाःत नाप स्वापू त्वाःदःगु दु । प्रिया रिजाल टेलिफिल्म 'गहना'य् खलनायिका जुयाः चर्चाय् वःम्ह खः । फिल्मय् कर्पिनि तिपू स्वापू स्यंकेगु हे वयागु मू भूमिका खः । धाथें चाहिं वयागु थःगु हे तिपू स्वापू नं ब्याहा जूगु स्वदँ लिपा हे पारपाचुकेय् वनाः क्वचाल ।

नेपाली फिल्मय् भुवन केसी, शिव श्रेष्ठ आदिपिं नं अज्याःपिं हिरोत खः गुमिगु चर्चा फिल्मया नापनापं कलाःलिसेया पारपाचुकें नं बरोबर पित हयाच्वंगु दइ ।

More Stories Like this