बांलाःगु मन्त्रालयया दावी

एमालेया नेता माधव नेपालं सरकार गठन याःगु लछि हे धइथें दइन तर वय्कलं सरकारयात पूर्णता बी मफुगु कारणं थ्व ला सरकारया घोर हे बेइज्जत जुयाच्वंगु खनाच्वना । झीथाय्यापिं नेतात गुलि जक लोभी धइगु ला न्हाय्कं थें हे यचुक खने दत नि । फुक्क नेतात थ्वहे मन्त्रालय माः वहे मन्त्रालय माः धकाः ल्वानाच्वंगु कारणं हे सरकारयात पूर्णता बी मफयाच्वंगु खः । यदि थ्व नेतात धाथें देशया सेवा याये धकाः वःपिं खःसा ला उमित न्ह्यागु मन्त्रालय बिउसां जिउ धकाः खुरुखुरु ज्या यानाः क्यनेमाःगु मखु ला उमिसं ज्या यायेगु मन्त्रालय मखु कि ध्यबा ग्वामग्वाम नये दइगु मन्त्रालय माः धकाः माग यानाच्वंगु दु । थ्व नेतात धाःपिं देशया सेवा यायेगु धकाः वःपिं मखु बांबांलाःगु ध्यबा नये दइगु मन्त्रालयया मन्त्री जुयाः ध्यबा कमे यायेत जक हे वःपिं जुयाच्वन धइगु ला न्हाय्कं स्वये थें हे प्रस्ट जुल नि । यदि ज्या याईपं खःसा न्ह्यागु मन्त्रालय जूसां छु पात देशया जनतायात हे सेवा यायेगु खः । मन्त्रालय धइगु ला तःधं चीधं धइगु दइ हे मखु नि । थःगु क्षमता क्यनेगु ला न्ह्याथाय् नं क्यनेफु । तर नेतातय्गु लागिं छु मन्त्रालय बांलाः छु मन्त्रालय बांमलाः धइगु खँ ज्या यायेगु खँया कारणं मखु कि गनं गुलि ध्यबा कमे याये फइ धइगु हिसाब किताबं धकाःसा क्यनीगु जुयाच्वन । भारतय् नं आः नकतिनि मन्त्रिपरिषद् गठन जुल । अन नं छुं भचा ला मन्त्रालयया बारे विवाद पिहां वःगु खः अय्सां ल्वापु जुयाः ज्या हे अवरुद्ध मजू । बिउगु मन्त्रालय कयाः खुरुखुरु ज्या यात । नेपालय् चाहिं ज्या तक हे न्ह्यःने यंकेफुगु मखु । न उमिसं बांलाःगु मन्त्रालय काल धकाः अन बांलाक ज्या याये खनीगु खः । थ्व सरकारया संविधान दयेकेत जक वःगु खः । थ्वया आयु धइगु निदँ जक खः । दछि ला वने हे

धुंकल । आः दछि बांकी दनि । दछिया दुने न्ह्याक्व हे बांलाःगु मन्त्रालय वःसां छु ज्या याये फइ ज्या ला जुइ हे फइ मखु । अय्नं बांलाःगु मन्त्रालय ताके यानाच्वंगु ला ध्यबा नयेत हे जक खः धइगु बांलाक हे सी दयाच्वंगु दु । थज्याःपिंपाखें आः नेपाःया जनतां छुं हे बांलाःगु ज्या जुइ धकाः आशा मकाःसां जीधुंकल थें च्वं ।

- रुद्रमणि पराजुली, टेकु ।

More Stories Like this