एमालेय् सभासदतय् बबाल
बूपिंत जक मन्त्री दयेकूगुलिं आलोचना
यें (सन्ध्या टाइम्स) / एमालें चुनावय् बूपिं मनूतय्त जक सरकारय् यंकल धकाः पार्टीया संसदीय दलय् घोर विरोध जूगु दु । थौं सुथय् च्वंगु एमाले संसदीय दलया बैठकय् चुनाव त्याका वःपिं सभासद् व प्रधानमन्त्री माधव नेपाल नापं पार्टी अध्यक्ष झलनाथ खनाल दथुइ थ्व खँयात कयाः चर्काचर्की जूगु खः ।
बैठकय् सभासद्तय्सं संविधान सभाया चुनाव त्याकावःपिं १०९ म्ह सभासद्त दुसां सरकारय् धाःसा चुनावय् बूपिंत जक मन्त्री दयेकल धकाः नेतृत्वया तच्वःगु आलोचना याःगु खः । सूत्रं बिउगु जानकारी कथं बैठकया ५० प्रतिशत स्वयां अप्वः सभासद्तय्सं पार्टी नेतृत्वया आलोचना याःगु खः ।
पार्टीया नेतृत्व थ्व इलय् सिद्धान्तविहिन जुयाच्वंगु दु धासें सभासद्तय्सं हरुवातय्त मन्त्री दयेकाः पार्टीं लोकतान्त्रिक मूल्य व मान्यताया उपहास याःगु द्वपं नं बिउगु खः ।
पार्टी सिद्धान्तविहिन जुया वनाच्वंगुलिं हे जेबी टुहुरे थेंज्याःपिं कार्यकर्तात पार्टीं पलायन जुया वनाच्वंगु द्वपं सभासद्तय्सं बिउगु खः ।
अथेहे प्रधानसेनापति प्रकरणय् राष्ट्रपति डा. रामवरण यादवं ल्ह्वंगु पलाः गलत धकाः सीक सीकं नं पार्टी नॆतृत्वं राष्ट्रपतिया पलाःयात समर्थन यानाः सरकारय् वनेत बिन्तिपत्र तःवंगु गम्भीर त्रुटि खः धकाः नेतृत्वयात द्वपं बिउगु दु ।
राष्ट्रपतिया पलाः गम्भीर गल्ति खः धासें पार्टी नेतृत्वं थुकिया बारे स्पष्ट धारणा पित हयेमाःगु माग नं सभासद्तय्सं याःगु दु ।
लिसलय् प्रधानमन्त्री नेपालं राष्ट्रपतिया पलाः पायछि जूगुलिं उकिया बारे पुनर्विचार मयायेगु खँ धयादिल । प्रम नेपालं राष्ट्रपतिया पलाः संवैधानिक खः धासें रथी कुलबहादुर खड्कायात सम्मानजनक रुपं विदाइ यायेगु जानकारी नं अन बियादिल ।
सभासदतय् न्ह्यसः लिसः बिसें प्रम नेपालं चुनावय् पराजित जूपिंत ज्याया जिम्मेवारी बीगु लागिं
सरकारय् यंकागु खः धयादिल । वयकलं धयादिल 'चुनावय् त्याःपिं ला संविधान दयेकेगु ज्याय् हे लगे जुइमाः उकिं चुनावय् बूपिंत सरकारय् यंकागु खः ।'
बैठकय् च्याक्वःगु महाधिवेशन लिपा एमाले छगू पार्टी सिबें नं छगू मोर्चाय् परिणत जूवंगु द्वपं सभासद् यमलाल कँडेलं बिउगु खः । वय्कलं 'चुनावय् बूपिंत सरकारय् यंकाः बेरोजगारतय्त रोजगारी बीगु ज्या पार्टीं याःगु' धासें नेतृत्वया कडा आलोचना यानादीगु खः ।
प्रम नेपालं थःत संविधानसभाया १० प्रतिशत सभासद्यात सरकारय् यंकेमाः धकाः दवाव वयाच्वंगु खुलासा नं यानादीगु दु ।
