नेवाः ध्वाँय् स्वये दयेमा

नेपालमण्डल बन्द यायेधुंकाः आः नेवाःतय्सं सकलें नेवाःतय्गु भावनायात पित ब्वयेगु लागिं छगू हे मंकाः ध्वाँय् दयेकाः ब्वयेकेगु धाःगु खँ न्यने दयाः नुगलय् तसकं आनन्द वःगु दु । झी नेवाःतय्गु ध्वाँय् छपु माल धकाः यक्व हे न्ह्यःनिसें खँल्हाबल्हा पिहां वयाच्वंगु खः । तर खँ पिहां वःसां ध्वाँय् दयेकेगु ज्या धाःसा न्ह्यलुइके मफयाच्वन । उकिया कारण छु खः गथे खः धकाः झीसं मसिउ । तर विगतय् न्ह्यागु हे खँ जूसां आः चाहिं ध्वाँय् दयेकेगु ज्या शुरु यायेगु धकाः पत्रपत्रिकाय् विज्ञापन हे पिहां वयाः आह्वान समेत याःगुलिं आः चाहिं पक्कां हे ध्वाँय् दयेकेगु ज्या शुरु जुल धकाः मनय् ढुक्क जूसां जिल । तर अज्याःगु ध्वाँय् धाःसा फुक्कं नेवाःतय्त ग्रहण जुइगु कथंयागु हे जुइमाः । छगू जक जातिया चिं पिलू वइगु अथवा छगू जक धर्मया प्रतिक थें खने दइगु अथवा छगू जक थाय्यागु प्रतिक सी दइ कथंयागु ध्वाँय् धाःसा दयेके मजिउ । अज्याःगु ध्वाँय् दयेकल कि उकियात फुक्कं नेवाःतय्सं जिमिगु नं खः धकाः मंकाः रुपं कायेत थाकुइफु । अझ ला उकियात कयाः विवाद हे तक नं सिर्जना जुइगु सम्भावना दु । अय् जूगुलिं ध्वाँय् दयेकेधुंकाः विवाद पिहां वइगु ज्या झीसं याये मजिउ । अथे धकाः चिचीधंगु खँयात नं कुंखिनाः विवाद पिकायेगु ज्या नं झीसं याये मजिउ । मंकाः ध्वाँय् जुइगु जूगुलिं छता निता चीधंगु खँयात त्वःताः नं ग्रहण यानाः एकताया चिं ब्वयेमाः । ध्वाँय् याकनं स्वये दयेमा धकाः आशा याना ।

जगदिशचन्द्र अमात्य, ख्वप ।

More Stories Like this