चान्हय् कालभैरव

नेवाः समाजय् काल भैरव अथें नं छम्ह अजूचाया पुम्ह व ग्यानापुम्ह द्यः खः । नेवाःतय् मौलिक चर्या प्याखनय् कालभैरव जुयाः प्याखं हुलेगु हानं मेगु अजूचायापुगु विषय जुयाच्वन । वंगु शुक्रवाः येँया थँबही लागाय् लाःगु भगवान बाहालय् छगू अज्याःगु हे अजूचायापुगु ब्वज्या जुल । महाकाली प्याखं हुलीगु 'कालभैरव नाइट ।'

चर्या गुरु चन्द्रमान मुनिकारं बज्र कला कुञ्ज चायेकाः तःम्हेसित हे चर्चा प्याखं स्यनादीधुंकल । उकी मध्यय् कालभैरव प्याखं स्यना वंपिं आः तक प्यम्ह तिनि थ्यन । सुगन मुनिकार, भोगेन्द्र मानन्धर, येँ मनपाया पुलांम्ह मेयर केशव स्थापित व आः वयाः साहित्यकार संचारकर्मी अनुप सिं सुवाल । सुगन व भोगेन्द्र ला व्यावसायिक कलाकार हे जुल । केशव स्थापित व अनुप चाहिं शौखिन धायेमाली । कालभैरव प्याखं स्यनादीम्ह न्हूम्ह कलाकार अनुपं उकुन्हु तिनि स्यना काःगु कालभैरव प्याखंया प्रतिभा ब्वयेगु निंतिं शुक्रवाः छगू ज्याझ्वः यात गुकिया नां खः कालभैरव नाइट ।

अनुप थम्हं हे लसकुस यासें न्ह्याकूगु उगु ज्याझ्वलय् पञ्चबुद्ध, कुमारी, अन्नपूर्ण व वज्रयोगिनी प्याखं लिपा अनुपया कालभैरव प्रस्तुत जूगु खः ।

कालभैरव पिने ब्वयेगु छगू सामान्य प्याखं जक मखु । थ्व स्यना कायेत साधना समेत यायेमाः । ध्यान यायेमाः । एकाग्रताय् च्वनेमाः । अनुपं व फुक्कं याःगु दु । थ्व प्याखं हुलेबलय् म्हय् छगू कथंया उर्जा संचार जुइगु अनुपया अनुभव दु । कालभैरव प्याखं हुलेबलय् केवल म्हया बांकी जक मिले यानाः मगाः । न ल्हाः व तुतिया मिले जूगु स्टेप हे कालभैरव प्याखं जुइ । थुकिया निंतिं ला स्वयम् थः दुने हे कालभैरव दुबीकेमाःगु जुयाच्वन । थःहे कालभैरव जुयाः प्याखं हुलेगुया आनन्द हे मेगु । हुलीम्हेसित नं अले स्वइपिंत नं । उकुन्हुया ज्याझ्वलय् वास्तवय् अथे हे जुल । स्वइपिं व हुलीपिं निगुलिं पुचलं उलि हे आनन्द काल ।

ज्याझ्वलय् चर्या प्याखंया नापं चर्या म्ये व धुन नं न्यंकेगु ज्या जूगु खः गुकी दिपेन्द्र वज्राचार्यं सः बियादिल ।

उगु हे ज्याझ्वलय् चर्या गुरु चन्द्रमान मुनिकारयात नं हनेज्या जुल । चर्या थेंज्याःगु कथिन प्याखं स्यना बिउगु वापत मुनिकारयात शिष्य सुवालं सार्वजनिक रुपं हे अन हनादीगु खः ।

उगु ज्याझ्वः यायेगु लागिं माःगु व्यवस्थापनया जिम्मा मय्जु मनरा प्रजापतिं कयादीगु खः गुम्हेस्यां थम्ह नं छपु प्याखं अन न्ह्यब्वयादिल । कालभैरवया ख्वाःपाः पेन्टिङ सुदर्शन शाक्यं यानादीगु खः।

ज्याझ्वः सगं पुचःया ग्वसालय् जूगु खः । भगवानबहाः थेंज्याःगु खुल्ला थासय् जूगु उगु ज्याझ्वः स्वयेत छुं विदेशी पर्यटकत नं अन थ्यंगु जुयाच्वन । नेपाःया मौलिक प्याखं स्वये दयाः उपिं लय्ताः ।

चर्या नेवाः जक मखु नेपाःया हे छगू मौलिक प्याखं खः । विदेशय् नेपाःया मौलिक व अर्थपूर्ण प्याखं धकाः न्ह्यब्वइ धकाः चर्या हे क्यनीगु खः । गुगुं इलय् आगमय् जक हुलीगु धकाः गोप्य यानातःगु थ्व प्याखं थौंकन्हय् नेपालय् स्वयां विदेशय् 'पपुलर' जुयाच्वंगु दु ।

More Stories Like this