मधेशवादी दल झन आक्रोशित
एमालें गृह व कांग्रेसं स्थानीय विकास त्वःतेमाः
यें (सन्ध्या टाइम्स) / गठबन्धनया सरकार दयेकाः नं एमाले व कांग्रेसं खालि थः निगू पार्टी जक जानाः न्ह्यागुं निर्णय यानाच्वंगु कारणं मधेशवादी दलत तम्वःगु जक मखु यदि थथे हे खःसा थःपिं सरकारय् हे मवँसे पिने च्वनाः समर्थन यानाच्वने धकाः ख्याच्वः बियाहःगु दु । स्वंगू मधेशवादी दल नापं कांग्रेस व एमाले सहित न्यागू पार्टी दथुइ म्हिगः साढे ८ घण्टा तक जूगु वार्ताय् मन्त्रालय बाँडफाँड स्वयां अप्वः गठबन्धया संस्कार लागू यायेगु खः लाकि मखु धइगु खँय् विवाद जूगु खः ।
म्हिगः ताःहाकः वार्ता यानां नं छुं लिच्वः पिहां मवःगुलिं थ्व न्यागू पार्टी दथुइ थौं हानं वालुवाटारय् वार्ता जुइत्यंगु दु । वालुवाटार वने न्ह्यः पूर्व तयारीया निंतिं स्वंगू मधेशवादी दल दथुइ सिंहदरवारय् बिस्कं बैठक च्वंगु खँ नं सीदुगु दु ।
वर्तमान सरकारय् वनेगु खःसा थःत गृह मन्त्रालय हे माः धकाः मधेशी जनअधिकार फोरमं दावी यानाच्वंगु दुसा यदि गृह मबीगु खःसा झिंन्यागू मन्त्रालय बीमाः धकाः माग यानाच्वंगु दु । तमलोपां स्वंगू मन्त्रालयया माग यानाच्वंगु दुसा सद्भावना पार्टीं जलश्रोत दावी यानाच्वंगु दु ।
मधेशवादी पार्टीतय्सं थज्याःगु माग यानाच्वंगुलिं नेकां सभापति गिरिजाप्रसाद कोइरालां विजय गच्छदारयात गृह मन्त्रालय बिउसां जिउ धकाः प्रम माधव नेपालयात फोन यानाः इनाप याना हःगु दु । तर एमालें नं यदि थःपिंसं गृह त्वःतेगु खःसा कांग्रेसं स्थानीय विकास त्वःतेमाः धकाः माग यानाछ्वःगु दु । तर सुं पार्टीं गुगुं मन्त्रालय त्वःतेत तयार मजूगुपिं सरकार गठनया ज्या न्ह्यःने वने फयाच्वंगु मदुनि ।
कांग्रेसं थौंकन्हय् थःत बिउगु खुगू मन्त्रालय हे मगाःगु कारणं उकी छगू मन्त्रालय तछ्यानाः न्हय्गू दयेकाः ज्या चले यायेत्यनागु जानकारी प्रधानमन्त्रीयात बियाहःगु दु । प्रधानमन्त्रीपाखें धाःसा मन्त्रालय तछ्यानाः अनावश्यक रुपं न्हूगु मन्त्रालय दयेके मजिउ धकाः सुझाव बीगु पलेसा कांग्रेसं मन्त्रालय तछ्यात धाःसा जिमिसं नं छगू मन्त्रालय तछ्यानाः निगू पिकायेगु जुइ धकाः सहमति क्यना छ्वःगु खँ सूत्रं धाःगु दु ।
उखे थज्याःगु ज्या फुक्क कांग्रेस व एमाले निगू पार्टी जक च्वनाः यानाच्वंगुलिं तं प्वंकुसें सद्भावना पार्टीया राजेन्द्र महतों उमिसं थज्याःगु पहः क्यनाच्वन धाःसा थ्व सरकारया नं दिनगन्ती शुरु याःसां जिल धकाः ख्याच्वः बियादीगु दु ।
