नैंक्यालं लुइगु जात्राय्

स्वनिगःया दकलय् ताःहाकःगु जात्रा खः बुंगद्यःया जात्रा । थ्व जात्रा स्वयेत येँ यल ख्वप आदि थासं म्वःम्वः हे मनू वइ । तर उकुन्हु २०६६/२/२८ गते जूगु नैंक्यालं लुइगु जात्राय् छथ्वः स्वनिगलं पिनेयापिं रक्षक धाईपिं प्रहरीं नैक्यालं लुइ न्ह्यः हे लाठीचार्ज यात । झीगु स्वनिगः जात्रा पर्व उमिसं छु सिउ झी जात्राबलय् म्वः म्वः मुनी । उकिं न्ह्याइपुकेगु लागिं झीसं बाजं थाइ प्याखं हुली ख्याः नं याइ । उकुन्हु नैंक्यालं लुइम्ह बाज्या रथया च्वकाय् च्वनाः ख्याः याना च्वंबलय् क्वय् च्वनाः नं ख्याः यानाः हालाच्वन । वहे इलय् अन छ्थुं पुलिसं लाठीचार्ज यात । मनूत छथुं हे उखेंथुखें ब्वाँय् जुलसा २-३ मिनेट लिपा स्थिति ठिक जुल अले हानं नैंक्याःग्वः ख्याः यायां कुर्का हे हल । नैंक्या कायेत अन छगू कासा म्हितेथें हे जुल व न्ह्याबलें जुयाच्वनीगु हे खः कि नैंक्याग्वः लाका कयाः सुनां फु वं कयाः करुणामय द्यःयाथाय् छायेमाः । थुबलय् हे लाठी चार्ज यात । पुलिसतसें छु सिउ झीगु जात्राबलय् म्वःम्वः मनू मुनी ख्याः यानाः न्ह्याइपुकिपिं खः ।

थुमिसं थज्याःगु न्ह्याइपुगु जात्राबलय् सुरक्षा याये धकाः थन वयाः अःखतं झीत हे छ्यनय् कःनिमुस्या सिउगु । लाठी चार्ज यातसा गुलिसिनं अप्पां नं कयेकेगु ज्या यानाः झीगु जात्रा पर्वय् विकृति हयेत थनया प्रशासन व राज्य ख्यलय् च्वंपिसं स्वनिगलय् च्वनाच्वंपिन्त गथे यानाः जिल अथे यानाः ल्वाका तयेत स्वयाच्वंगु दु । न्हापा न्हापा झीसं सिउ कि प्रशासन पुलिसत गबलें नं झीगु जात्रा पर्वबलय् उपस्थित मजू । अले अन छुं नं ल्वापु मजू छुं नं अपि्रय घटनात मजू । थौकन्हयय् येँया जनमाद्यः बुंगद्यः आदि जात्राबलय् थुमिगु गन गन उपस्थित जुइ अन अन ल्वापु हे जुइगु । झी नेवाः खलःपुचःतसें सुरक्षा याये मफुला छाय् थुमित याकेगु झी स्वनिगलय् च्वंपिं नेवाः पार्टी नेवाः खलः नेवाः जनताया नेवाः मुक्ति मोर्चा उलिमछि दु । झीसं झीगु स्वनिगःयात सुरक्षा याये मफुला अवश्य फु । तर नं झीत विस्थापित न्ह्यागु ख्यलय् नं झीगु थासय् गैर नेवाःत उपस्थित याइ । उकिं झीसं संयमितता क्यनाः न्ह्यागु हे जात्रा पर्व आदि जुइमा बांलाक न्ह्याका वनेमाः । झीगु जात्रा ख्यलय् हुलदंगा याईपिं न्ह्याम्ह हे जुइमा उमित ज्वनाः झीसं हे कार्वाही यायेगु वा सम्झे यायेगु छगू नेवाः जन सरोकार दयेकेमाल । अले तिनि झी स्वनिगलय् च्वंपिं व स्वनिगलं पिने च्वंपिं नेवाःत सुं खनाः ग्याये माली मखु । मखु धइगु खःसा झीत न्ह्याबलें नं थुमिसं कःनिमुस्या सियाः नयाच्वनी । झीपिं थुपिंपाखें होसियार जुया च्वनेमाः । झी होसियार जुइ झीगु स्वनिगःया सुरक्षा झीसं हे याये । नेवा जनसरोकार गठन याये नेवाः नेवाः छप्पँ जुयाः छुं नं ज्या ख्यलय् न्ह्याःवने

तिर्थमान महर्जन, बागबजार

More Stories Like this