सुनां छुं हे याये मफुत मय्जु शैलजायात

निला ति न्ह्यःया खँ जुइमाः यलया छम्ह स्थानीय निवासी येँया टिचिंग अस्पतालय् थः मांया वासः याकेत वंगु जुयाच्वन । मांया पुलांगु पेस मेकर लिकयाः न्हूगु छुइमाःगु । उकिं छवाः ति आईसीयु कक्षय् हे तयाः उपचार यायेमाल ।

अबलय् उम्ह यलनिवासीया मां आईसीयु कक्षय् तया तःगु इलय् वया नापसं हे मेम्ह छम्ह नं मिसाम्ह विरामी भर्ना यानातःगु जुयाच्वन । अस्पतालय् वया थःथितिपिं नं खास हे मवः धाःसां जिउ । करिब छवाः धइथें वयात स्वयेगु ज्या छम्ह हे जक मनुखं यानाच्वन । व शायद उम्ह विरामीया काय वा किजा हे मखा जुइ ।

छन्हु यलनिवासी भाजु थः मांया हिया रिपोर्ट काये धकाः ल्याबय् वंबलय् उम्ह अपरिचित बिरामीया काय वा किजा नं रिपोर्ट कायेत ल्याबय् वयाच्वन । वया नं रिपोर्ट काः वःगु जुयाच्वन । तर रिपोर्टया नापनापं हि परीक्षण बिल नं वल । बिल खास अप्वः मखु । ७५ तका जक । तर उम्ह मिजंयाके धाःसा उलि ध्यबा नं मदु । वया छु याये छु याये जुल । वहे इलय् यल निवासी भाजुं माःसा लिपा काये का धकाः ७५ तका दां पुलाः वयागु रिपोर्ट लिकया बिल । तर रिपोर्ट ब्वनास्वःबलय् यल निवासी भाजु तसकं अजूचाल । खास यानाः रिपोर्टय् च्वयातःगु विरामीया नां खनाः । उकी च्वयातःगु नां खः सुश्री शैलजा
आचार्य ।

'थ्व सु शैलजा आचार्य हां ?' यलयाम्ह भाजुं अजूचायाः न्यन ।

'वहे का न्हापायाम्ह मन्त्री मखं ला ?' मनुखं लिसः बिल ।

'मन्त्री ओहो ! जिं ला म्ह हे मसिउ का । अले छिगु सु ले ?'

'जिगु ला सुं नं मखु हजुर । जि ला प्रहरीयाम्ह खः पाः च्वना बिउ धकाः आदेश वःगुलिं च्वनाबियागु जक खः । तर ग्व मन्त्री हं जि च्वंसांनिसें सुं छम्ह थःथितिं नापलाः वःगु मखं न सुं नेतातय्सं हे नापलाः वल । विरामी मनू दु खर्च यायेत तक हे ध्यबा बियातःगु मदु अवस्था खना हे दिल निं छिं ।'

शैलजाया कुरुवा च्वनाच्वंम्ह प्रहरी भाजुया खँ न्यनाः यलनिवासी भाजु अजूचाःगुया ठेगान हे मदु । वयां छुं न्हि लिपा छगू पत्रिकाय् शैलजाया अवस्थायात कयाः छगू पत्रिकाय् समाचार पिहां वल । व धुंकाः चाहिं छुं नेतात अस्पताल वयाः वय्कःयात नापलायेगु शुरु यात ।

मदुम्ह शैलजा आचार्य बैंककं लिहां वयेधुंकाः थनया टिचिंग अस्पतालय् भर्ना यानातःगु ईया दुर्दशा खः थ्व । म्हीग वय्कःयात अन्तिम श्रद्धांजलि प्वंकुसें नेपाली कांग्रेसया सभापति एवं तत्कालिन प्रधानमन्त्री गिरिजाप्रसाद कोइरालां मिखाय् ख्वबि हुहुं धयादिल 'जि प्रम जुयाच्वनागु पालय् छुं हे याये मफुत ।'

वास्तवय् शैलजा आचार्ययात अन्तिम इलय् वयाः कोइराला जक मखु मेपिं नं सुनां छुं हे मयाः धइगु खँ च्वय् न्ह्यथनागु छगू घटनां क्यं । देय्या उपप्रधानमन्त्री समेत जुयादीधुंकूम्ह मनू अस्पतालया छगू बेडय् हफ्तौं तक गुमनाम जुइक अशक्त जुयाच्वंगु घटनां धाइ वय्कः प्रति राष्ट्र जक मखु गुगुं इलय् वय्कःया न्ह्यःनेलिउने चाःचाःहिला जुइपिं शक्तिकेन्द्रतय्सं तकं गुलि वेवास्ता याःगु जुयाच्वन ।

संवाददाता

More Stories Like this