मौकाय् चौका

जःथी बरे

क्या तालयापिं मनूत दु धाःसां । जितः प्र.मं. याये माली धकाः ग्यानाच्वंगु । मखु जि निथासं बूसां स्वथासं बूसां छिमित छाय् माःगु चुनावय् ल्वासेंलि ला त्याः बू धइगु ला जु हे जुइनि । निथासं बूम्ह प्र.म. जुइ मजिउ धायेसःपिंसं छथासंसां त्याका छ्वये मसः ला जितः निथासं बुकीपि नं छिपिं प्र.म.जुइ मजिउ धाईपं नं छिपिं । मिले मजूगु खँ ल्हाये मते ले भाइ । निथासं बूम्ह प्र.मं. जुइ मजिउ धकाः ला जिं नं सिउ नि अय्नं छु याये ग्वःक्वः ला थज्याःगु मौका छखे लायेधुंकल । थन जितः छक्वः प्रधानमन्त्री धायेकेगु गुलि इच्छा दु । थज्याःगु इच्छा पूवंकेत मौकाय् चौका ह्वाये माल नि मखुला हाकनं जि यसें प्रम जुइत सभासद जूवनागु नं मखु । प्रचण्ड जिगु छेँय् वयाः का माधवजु संविधान दयेकेत छि थेंज्याःम्ह नेता मदयेक हे मगाः अज्याःम्ह नेतायात सभा हलय् मखनीबलय् जितः ला मिखां ख्वबि हे वइगु न्ह्यागु हे यायेमाःसां थ्व प्रचण्डया बिन्ति छगू सितिकं छ्वये मते धकाः ख्वयाः धाःवल । उकिं जिं वय्कःया बिन्तियात स्वीकार यानाः एमालेया हे सभासद सुशिलचन्द्र अमात्ययात राजीनामा बीकाः सभासद जुया बिया । उलि जक ला म्हाः तक मधासे संविधान समितिया सभापति नं जुया बिया । छु याये पासां रिक्वेस्ट यात । तर जिगु छगू गल्ति चाहिं जूगु खः का जिं नेवाः सभासदयात चीके मजिउगु खः । छु याये थः ब्रम्हू लात ब्रम्हूयात चीकेगु जिगु मनं हे मबिउ । आः नं स्व जि प्रधानमन्त्री जुइधुंकाः स्वकीय सचिव प्रेस सल्लाहकार राजनीतिक सल्लाकार फुक्क हे ब्रम्हू नियुक्त याना । खय्त ला थ्व फुक्कं प्रचण्डं यानाः हे जूगु खः । वं उलि धाः मवःगु जूसा जि सभासद् जुइ धइगु ला म्हगसय् हे मखं । धाइगु नि 'खुँयात लँ क्यने मत्यः ।' आः स्व लँ क्यंम्ह बँय् जि च्वय् का । थ्व भाग्य धइगु नं गनं वइगु गनं वइगु । थ्व इलय् प्रमं जुइगु च्वयातःगु खिनं न्हापा जुइ धयां गन दइ जि नं न्हापा निथासं त्याका च्वनाम्ह ला खःनि निथासं चुनाव दनाः बूसा जक प्रम जुइ दइ धकाः च्वयातःगु लानाच्वन । छगू हिन्दी उखान दु नि 'दाने दाने मे लिखा हे खानेवालों का नाम ।' थ्व नं अथे हे का ।

थ्व राजनीति धइगु नं गजब हे खः बाS वयातं थ्वयातं ब्वमबीकं सरकारया आलोचना मयाकं च्वय् थ्यने धकाः ला वाकाः हे तयेम्वाः । जि नं ला न्हापा तसकं सोझाम्ह नि । ब्रम्हू जूसां नेवाःत थें का छु छु बिल व जक कायेगु । जितः थ्वहे माः धका धायेगु मखु । थःत माःगु ला लुटे हे याये माःगु जुयाच्वन खिनं । अथे जुयाः ला थौं तक नेवाःत प्रधानमन्त्री जुइ मफुगु । नेवाःतय्के लुटे यानाः कायेगु धइगु बानी हे मदु । खय्त ला जि राजनीति ख्यलय् तसकं संघर्ष यानावयागु खः अय्नं बल्ल बल्ल छक्वः प्रधानमन्त्री जुइगु अवसर वलं नं सुनां जक छु मधाः धइगु हे मदु । खँ हे अप्वः का छिपिं ला । तर न्ह्याम्हेस्यां न्ह्यागु हे धाःसां गिरिजाबाबु ला राजनीति म्हितेगुली माहिर का मेमेपिनिगु सरकार क्वथःलेगु ला देपा ल्हाःया खेल का वयागु निंतिं । न्हापा एमाले सरकार ९ महिनां क्वःथःला बिउम्ह व हे ला खःनि । आः वयाः न्हापाया ऋण पुले थें जितः प्रम याना बिउगु जुइ का । जिं ला गिरिजाबाबुयात धयागु नं खः म्वाःल थ्व छगू कार्यकाल प्रचण्डयात हे त्वःता बिउ धकाः । वं ला अःखबतं थज्याःगु तालं छ प्रम जुया नइ मखु धकाः ब्वः जकं बिल । जगलं वःम्ह प्रम जुइधुंकल छ शहरय् च्वंम्ह चाहि खालि म्हगसय् जक म्हंका च्वँ । जितः छु कम्युनिष्टया सरकार चले जुयाच्वंगु स्वया च्वनेगु इच्छा दु ला जिं ला छंगु अवस्था खनाः 'तसकं हे माया वनाः का छ छक्वः प्रम जु धयागु का खँ थूगु मखु म्वाः मदुगु खँ ल्हानाच्वनीगु धकाः ब्वः जक बिल का छु याये । बरु गिरिजाबाबुया माया गुलि तक दइगु खः मसिउ । जि नं प्रम छगू नयेगु लोभं काँग्रेसया छत्रछाँयाय् च्वना । बरु प्रचण्डं जक छु छु धाल जुइ ख ला व नं ल्वःम्ह । थः प्रम जुइक जुइकं कार्यकर्तातय्सं थाय्थासय् म्वाः मदुगु हुलदंगा याना च्वंसां सुम्क च्वनाः जनताया नयेत्वने खं मखं शान्ति सुरक्षु दु मदु मस्वसे वयातं थ्वयातं चीकाः सरुवा बरुवा यानाः म्वाः मदुगुली ल्हाः तः जुइगु अले गिरिजाबाबुया तं पिहां वल । वयात तं पिकायेके जिउम्ह ला उघ्रिमय् ल्हाः चासुका हइगु । वया ल्हाः चासुत कि थःगु हे पार्टीया नेतायात ला बाँकी मतः मेपिनिगु ला खँ हे त्वःति । आः जिगु नं म्याद गुलि दइगु खः मसिउ बा ऽ जि ला सन्तान मदयाः थ्याकामचा कयाहःम्ह थें । लिपा जिमि सन्तान हे मखु धायेत छु बेर । चुनावय् त्याना मवयेगु नं साप हे मजिउ खिनं का । व नं निथासं बूबलय् ला हाःनाः मदुम्ह मचा थें का सुयां हे मययेक प्रधानमन्त्री जुइ माःगु छु याये । न्ह्यागु हे जूसां प्रम जुइ हे धुन आः व खँ थ्व खँ छु खँ प्रचण्ड भाजुं जितः सभासद जुइमाल धाःगुलिं सुशिलचन्द्रं पद त्वःताः जितः बिउगुलिं नापं गिरिजा बाबुं छ हे प्रम जु धकाः माया याःगुलिं वय्कःपिंत सुभाय् का ।

More Stories Like this