देशभक्त नेतां समस्या समाधान याइ

डी.आर. खडगे

छुं हफ्ता न्ह्यः अष्ट्रियाया राजधानी भियनाय् शिखतय्गु गुरुद्वार दुने हतियारधारी पुचः दुहां वनाः शिखगुरुया हत्या यानाः मेमेपिं भक्तजन शिखतय्त घाःपाः याना बिल धकाः भारतया पंजाब राज्यया फुक्क धइथें थासय् तःधंगु हुलदंगा जुल । पंजाबी शिखतय्त नियन्त्रण यायेत कÏर्यू तक तयेमाःगु स्थिति वल । भारत सरकारं तुरुन्त अष्ट्रिया सर-कारयात घटना जूगुया प्रक्रिया बारे न्यनेकने यानाः क्षतिपूर्तिया समेत माग यात । मेगु घटना अष्ट्रेलियाया मेलबोर्नया शिक्षालयय् अध्ययन याना- च्वंपिं भारतवासीतय्त आक्रमणया निशाना दयेकल धकाः भारत सरकारं अष्ट्रेलिया सरकारयात भारतीय विद्यार्थीतय् सुरक्षा यायेमाल धकाः कडा दबाव बिल । थ्व घटनां छु क्यना बिल धाःसां भारतीय जनता व सरकार थःगु नागरिक प्रति गुलि संवेदनशील दु । अर्बौं अरब जनता दुगु थासय् तकं हमला यानाः छुं नागरिक घाःपाः याना बिल कि सरकारं चिन्ता कयाच्वनी धाःसा यदि विशाल भारतया एक इन्च जमिन जक जःलाखःला देपाखें च्वय् क्वय् यात धाःसा सारा जनतां विरोध यायेगु शुरु याइ । भारत सरकारं नं बास्तविक घटना छु खः धकाः अध्ययन यानाः कडा पलाः ल्ह्वनी । भारतया फुक्क नेतात राष्ट्रवादया सवालय् छधी जुयाच्वनी ।

झीगु देय्या नेतात खनाः अजू चायेमाःगु स्थिति दु । छाय्धाःसा नेतातय्के दृष्टिकोण नीति जिम्मेवार अनुशासन इत्यादि छुं हे खने मदु । नेतातय्गु सोच चिन्तन बिचार खालि जनतायात भ्रमय् तयाः मूर्ख यायेगु जक जुयाच्वंगु दु । नेतातय्गु सोच खः जनतायात गुलि मूर्ख याये फइ उलि हे देय्या सम्पत्ति झ्वाम्म यानाः नये फइ । थज्याःगु सोचयापिं व्यक्तिवादी नेतात थौं सत्ताभोगी जुयाच्वंगुलिं नं न्ह्यागु कुकर्म यायेत नं उपिं तयार जुइगु खः । नेतात नकारात्मक सोचं ग्रष्ट जुयाच्वंगुलिं विदेशी शक्तिं उपयोग यानाच्वंगु खः । न्हापा न्हापा जूसा तराइबासीयात बिहारी गुण्डा व डाँकातय्सं जक लुटे याइगु अपहरण व हत्या यानाः दुःख बियाच्वनीगु खः । बिहारी गुण्डा व डाँकातय्सं तराईबासीयात न्ह्याक्व हे दुःख कष्ट बियाच्वंसां नं नेपाःया प्रशासन खालि तमाशे जुयाः स्वया जक च्वनीगु । नेपाःया थ्व प्रशासनपाखें भारतीय डाँकातय् तय् हौसला बढे जुयाः तराईबासीयात सास्ति यानाच्वंगु खः । यदि प्रशासन जनताया सेवा याईपं खःसा बिहारी गुण्डा व डाँकातय्त निरुत्साही यानाः तराईबासीयात भयरहित याये माःगु खः ।

वंगु हफ्ताय् भारतया सीमा सुरक्षाबल एसएसबी या छगू पुचलं दाङ्गया २२ जिल्लाया सिमाना हाचांगायाः नेपाःया जनतायात आतंकित यायेगु ज्यात । ग्याःपिं नेपाली जनता छेँबुँ त्वःताः सुरक्षित स्थान देउखुली धाःथाय् वयाच्वन । भारतया जवानं आतंक जक मचे यानाच्वंगु मखु अझ अपहरण यानाः स्थानीय मिस्तय् इज्जत लुटे यायेगु ज्या तकं यानाच्वंसां नं प्रजिअ व प्रशासन इकाई सुम्क च्वनाच्वंगु खनाः जनता आक्रोशित जुयाच्वंगु दु । अझ ला बाराया प्रजिअ तारानाथ गौतमं थथे तकं धाल कि बिभागं थुकियात कयाः अनुसन्धान यानाच्वंगु दु । देउखुरीया प्रजिअ ऋषिराम ढकालं बिस्थापित जनतायात अस्थाई शिविरया व्यवस्था यायेत्यनागु दु धाल । प्रजिअतय्गु धापुतिं नं थ्व खँ प्रस्ट जुल कि नेपाःया प्रशासनिक अधिकारीत खालि जनतां पुलातःगु करपाखें तलब भत्ता नयाः भारतयात लय्तायकेगु ज्या जक याना नईपं खः । यदि प्रशासकीय अधिकारीतय्के भचा जक देय् व जनताप्रति माया दुगु खःसा सीमा क्षेत्रय् वनाः अध्ययन यानाः समस्या समाधान यायेगु पक्षय् वनेमाःगु खः । यदि थःगु पहलं समस्या समाधान याये मफुत धाःसा थः सक्रिय जुयाः जनताया साथ कयाः भारतया अधिकारीनाप छलफल यानाः समस्या समाधान यायेत स्वयेमाःगु खः । थःगु कुतलं समाधान याये मफुत धाःसा जक गृह व रक्षा मन्त्रालययाके ग्वाहालि काः वनी । थनया प्रशासकीय अधिकारीतय्गु पहः खनाः झन हे जिम्मेवारी भावना मदुपिं धकाः तायेकेमाःगु दु । देय्या परराष्ट्र मन्त्री सुजाता कोइरालां ला भारतं भूमि अतिक्रमण याःगु मदु धकाः हददर्जाया हे फय्गं खँ ल्हानाः भारतभक्ति क्यनाच्वंगु दु ।

साधारण जनता नं सिउगु खँ खः भारत व पाकिस्तानया दथुइ सीमा सम्बन्धी विवादं यानाः न्ह्याबलें हे कचकच जुया च्वनीगु । विशेष यानाः काश्मिरया सीमा विवादया कारणं बरोबर युद्ध नं जुया च्वनीगु खः । भारत व बंगलादेशया दथुइ नं सीमा विवादं याना स्वापू स्यनाच्वंगु खः । बंगलादेशया सीमा सुरक्षु बलं बरु भारतनाप युद्ध यायेत तयार जुइ थःगु भूमि एक इन्च जक हडप याःसां सुम्क वनी मखु ।

भारतया सीमा सुरक्षा फौजं बंगलादेशया सीमा पार यानाः जनतायात आतंकित यायेगु कुतः नं याना मच्वंगु मखु । तर बंगलादेशया सीमा सुरक्षा बलं तुरुन्त फाइरिंग यानाः भारतया सीमा सुरक्षा बलयात हटे याना छ्वइ । झीगु देय्या रक्षा व गृह मन्त्रालयया ज्या थःहे जनतायात ख्यायेगु जक जुयाच्वंगु दु । वास्तवय् सैनिक व प्रहरीया ज्या विदेशी शक्तिं अन्याय अत्याचार याना च्वंसा प्रतिकार यायेत तयार जुइमाःपिं खः । भारतया सैनिक शक्तिया न्ह्यःने बंगलादेशया सैनिक नं मग्याः । झीगु देशय् जक नेतातय्सं भ्रम ब्वलंकेगु यानाच्वंगु दु । भारतया सैनिक शक्ति तसकं क्वातुगुलिं झीसं भारतं गल्ति याःसां सुम्क सह यायेमाः धयाच्वनी । थज्याःगु मानसिकतायात च्यः मानसिकता धाइ । बहुदलीय नेतात असक्षम लोभी व लालची जुयाच्वंगुलिं जनताया समस्यायात ध्यान मबिउ थें देय्या भूमि भारतं मिचे याना च्वंसां नं नेतातय्सं ध्यान बियाच्वनी मखु । छाय्धाःसां फुक्क नेतात भारतभक्ति क्यनेत तँछाड मछाड यानाः न्ह्यःने च्वं वनीपिं खः । भारतया आशिर्वाद मदयेकं आः नेपाःया सत्ताय् च्वनेगु सम्भावना मदु धइगु मानसिकतां थुपिं ग्रस्त जुयाच्वंगु दु ।

More Stories Like this