मधेशवादी दलत तम्वल

थौं मन्त्रिपरिषद विस्तार याःसा वहिष्कार

यें (सन्ध्या टाइम्स) / एमालेया वरिष्ठ नेता माधव नेपाल प्रधानमन्त्री जूगु स्ववाः लिपा थौं मन्त्रिमण्डलया स्वंगूगु चरणया विस्तार यायेत्यंगु दु ।

म्हिगः नेपाली कांग्रेसया सभापति गिरिजाप्रसाद कोइराला व प्रधानमन्त्री नेपाल दथुइ मन्त्रालय बाँडफाँडय् खँ मिले जुइवं थौं मन्त्रिमण्डल विस्तार यायेत्यंगु खः ।

सहमति कथं गृह रक्षा साचार अर्थ शान्ति तथा पुन- र्निर्माण व सामान्य प्रशासन मन्त्रालय एमालें काइगु जूगु दुसा परराष्ट्र स्वास्थ्य स्थानीय विकास कानून तथा न्याय जलश्रोत व श्रम तथा यातायात मन्त्रालय कांग्रेसं काइगु जूगु दु ।

उखे मन्त्रालय बाँडफाँडय् थःपिंत बांलाःगु मन्त्रालय भाग मबिउ धासें मधेशवादी दलतय्सं असन्तुष्टि प्वंकूगु दु । मधेशी जनअधिकार फोरम गच्छदार पुचः पाखें थौं जुइगु मन्त्रिमण्डल विस्तारय् विरोध स्वरुप ब्वति मकायेगु निर्णय याःगु दु । फोरमं थःत गृह जलस्रोत व संचार मन्त्रालय माः धकाः दाबी याना वयाच्वंगु खःसा थ्व स्वंगुलिं मन्त्रालय थःत मवइगु जुइवं फोरमं थौंया मन्त्रिमण्डल विस्तारय् ब्वति मकायेगु निर्णय याःगु खः ।

थ्वहे झ्वलय् मन्त्रिमण्डलय् मधेशवादी दलतय्गु छगू हे धारणा दयेकेगु निंतिं थौं मधेशवादी दलतय् मंकाः बैठक च्वंगु दु । तमलोपाया संसदीय ज्याकू सिंहदरवारय् च्वंगु उगु बैठकय् मधेशवादी दलतय्त स्यल्लाःगु मन्त्रालय मवःगु सम्बन्धय् सहलह यानाः आः गुकथं न्ह्याः वनेगु धकाः बिचाः जुयाच्वंगु खँ सीदुगु दु ।

फोरमयात गृह मन्त्रालय मबिउगु खँयात कयाः फोरमया वरिष्ठ नेता विजय गच्छदारं कांग्रेस सभापति गिरिजाप्रसाद कोइरालायात नं नापलानाः खँल्हाबल्हा यानादीगु दुसा गच्छदारनाप खँल्हाबल्हा लिपा हे कोइरालां प्रम नेपालयात फोन यानाः फोरमयात संचार मन्त्रालय बीत आग्रह यानादीगु खँ सीदुगु दु । लिसें वय्कलं एमालें प्रस्ताव याःम्ह संचारमन्त्री शंकर पोखरेलयात शान्ति तथा पुनर्निर्माण मन्त्री दयेकेत नं सुझाव बियादीगु खँ सूत्रं धाःगु दु ।

सभापति कोइरालाया आग्रह लिपा प्रम नेपालयात मिछंगु अवस्था वःगु खँ धाःगु दु । उकिं आः थुकिया बारे छु यायेगु धकाः एमाले दुने सहलह जुयाच्वंगु दु । यदि फोरमयात जलस्रोत बीमाःगु अवस्था वल धाःसा न्हापा एमालेपाखें गृहमन्त्रीया लागिं प्रस्ताव यानातःम्ह भिम रावलयात छु मन्त्रालय बीगु धइगु बारे बिचाः ब्याकाच्वंगु दु । थौं जूगु एमालेया सहलह बैठकय् रावलयात नं सःतातःगु दु । वय्कः न्हापा नं पर्यटन मन्त्री जुइधुंकूगुलिं यदि गृहय् यंके मफुत धाःसा पर्यटन मन्त्री जूसां दयेके फइगु खँ बालुवाटार स्रोतं धाःगु दु ।

उखे मन्त्रिमण्डलय् सुयात सुयात छ्वयेगु धइगु बारे कांग्रेस दुने नं आन्तरिक सहलह जुयाच्वंगु दु । कांग्रेसं उर्जा मन्त्रालय डा. प्रकाशशरण महत जलस्रोतय् बालकृष्ण खाँड व पूर्णबहादुर सेर्मायात स्थानीय विकास मन्त्रालयया जिम्मा बीत्यंगु दु । राज्य मन्त्रीया बारे धाःसा अझं निर्णय याये मफुनि ।