नेपाः पार्टीयात इनाप

छिगु लोकंह्वाःगु स्तम्भ 'जिगु नं धायेगु दु' मार्फत नेपाः राष्ट्रिय पार्टीया ध्यानाकर्षण यानाच्वना । नेपाली कांग्रेसया वयोवृद्ध नेता सभापति गिरिजाप्रसाद कोइरालाजुया विशेष अनुग्रहलं प्रम जुइत ताःलानादीम्ह नेकपा एमालेया थाकुलि नेता श्री माधवकुमार नेपाल जनतापाखें तिरष्कृत जनसमर्थन मदुम्ह यात समर्थन यायेत ने.रा.पा.यात नं मेमेगु दलतय्त ह्ययेकू थें छु छु बी धकाः बाचा याःगु दु ।

'नेपाल' यात समर्थन यायेगु खँय् ने.रा.पा. पाखें गज्याःगु माग न्ह्यब्वःगु खः एमाले पाटीं छु छु बी धकाः बाचा याःगु खः मौखिक वा लिखित छु खः जनताया न्ह्यःने ननां तयेत इनाप दु । माओवादी नेता का. प्रचण्डया विश्लेषण व सार्वजनिक व सार्वजनीन सरोकारया धापू कथं कतांमरि चम्चागिरी सरकारयात समर्थन व विश्वास बी न्ह्यः मतदाता जनताया न्ह्यःने छगू वचन न्ह्यब्वयेगु धृष्टता तक नं मयासे 'सबैलाई चेतना भया' धइगु अभिव्यक्ति सार्वजनिक याये थें तायेकाः समर्थन व विश्वास बिउगु खःसा छुं धायेथाय् मदु । मखु सदनय् समानुपातिक सदस्यया हैसियत बीत जनतां थःगु अमुल्य ई व भोट बिउगु खःसा जनताया राय छु खः धकाः छक्वः बुझे यायेगु आवश्यकता मदुला ?

पटक पटक आश्वासन व विश्वासयात त्वाःथलेगु व जनतायात लखय् मिखा कंकेफुम्ह ध्वंचा सिबें छट्टुम्ह गिरिजाया धालखँय् ब्वां जुइगु पाय्छि मखु । जेष्ठ ९ गते बिउगु गिरिजाया अभिव्यक्ति 'माओवादी पासापिंसं छु धाःगु खः जिं ला छुं नं मथू' गुलि कपटपूर्ण व निरीहपूर्ण खः धइगु खँ ताःहाकःगु वहस याना च्वनेमाःगु खँ मखु । थुलि कुहां वयाः खँ तयेफुम्ह व्यक्तिया आश्वासन व विश्वास लिउलिउ वनाः ने.रा.पां. छु यायेत स्वःगु खः छुं हे सीके मफुत ।

पासा मुना, लगं येँ ।

More Stories Like this