नकःमि समाजया बेकरी तालिम क्वचाल
नकःमि समाज सेवाः पुचः (संघ)या ग्वसालय् साथी श्रम प्रशिक्षण केन्द्रया ग्वहालिइ झिन्हुन्ह्यःनिसें न्ह्याकाच्वंगु बेकरी तालिम मंगलवाः क्वचाःगु दु ।
तालिम क्वचायेके ज्याझ्वःयात त्वाः देवाय् मत च्याका उलेज्या यानादिसें मूपाहाँ नारायण लाल नकःमिं तालिमय् ब्वतिकयादीपिं सकलसिनं सयेकादीगु सिपयात व्यवहारय् छ्यालेमाःगु धयादिसें सकलसित भिंतुना व सुभाय् बियादिल । तालिमय् ब्वतिकयादीपिं ३२ म्हेसित श्रम प्रशिक्षण केन्द्रया हलय् मूपाहाँ नारायण लाल नकःमिं दसिपौ लःल्हानादीगु खः ।
साथी श्रम प्रशिक्षक केन्द्रया प्रमुख लिसें मू–प्रशिक्षक सजना नकःमिं झिन्हुया तालिमय् छन्हु हे त्वःमफिक ब्वतिकयादीगुलिं सकल प्रशिक्षार्थिपिंत सुभाय् बियादिसें थःम्हेसिनं सिक्व फक्व स्यनागु व अझं छुं त्वःफ्यूथें च्वंसा न्ह्याग्गु इलय् नं स्वापू तयादिल धाःसा गुबलें नं उसि मचाःसे सक्व फक्व कना बी/स्यनाबी धयादिल ।
तालिमय् डोनट (क्रिम, चकलेट, कोकोनट, सादा), पाउरोटी, बन, हटडग बन, पिज्जा, ब्राउन केक, फ्रुट केक, कुकिज, क्रोसन, बर्थ डे केकलिसें आलु चिप्स व पाउँ दयेकेगु समेत स्यनादीगु खः । तालिमय् ब्वति कयादीपिं मध्ये श्रीजा नकःमि, रत्नेश्वरी नकःमि श्रेष्ठ, ज्ञानकुमार महर्जन व आकृष्टि नकःमिं तालिम ज्वःछि सयेकागुया बारे थःथःगु नुुगः खँ तयादीगु खः । तालिमय् ब्वति कयादीपिं विद्यार्थीपिंपाखें ग्वसाः खलः नकःमि समाज सेवा पुचः (संघ)यात सुभाय् पौ लःल्हानादीगु खःसा, मू–प्रशिक्षक सजना नकःमियात मतिनाया चिं लःल्हानादीगु खः ।
समाजया मू–छ्याञ्जे लिसें कार्यवाहाक अध्यक्ष सूर्य बहादुर नकःमिया सभापतित्वय् क्वचाःगु ज्याझ्वःलय् ज्याझ्वःया कजि महेश कुमार नकःमिंं लसकुस यानादीगु खःसा नगिना नकःमिं ज्याझ्वः न्ह्याकादीगु खः ।
News Location:
