सिक्किम सरकारया मुख्यमन्त्रीया जनसम्पर्क अधिकारी येँय्

राजु नापित पाखेँ

सिक्किम सरकारया मुख्यमन्त्री प्रेमसिंह तामाङया जनसम्पर्क अधिकारी रत्नमणि प्रधान येँ झाःगु दु । वयकनापं मुख्यमन्त्रीया ज्याकूया मेपिं अधिकारीपिं नं झाःगु खः । सिक्किमय् हनावयाच्वंगु येँया (इन्द्रजात्रा) या बिषयसं जात्रायात अझ भब्यरुपं न्ह्याकेत छु गथे यायेफइ व यायेमालिइ धैगु बिषय नापं निगू देय् दथुइया सांस्कृतिक सम्बन्धयात गुकथं सुमधुर यानायंके फइ धैगु बिषयसं सहलह यायेत येँ झाःगु खः ।

सिक्किम नेवाः गुथिया नायः निर्मल कुमार प्रधानया नेतृत्वय् गुथिया पदाधिकारी दुजः सहित येँय् थ्यंकवःम्ह रत्नमणि प्रधान नापंया प्रतिनिधिपिंसं येँया इन्द्रजात्रा व्यवस्थापन समितिनाप सहलह याःगु खः । येँया द्वारिका छेँय् बागमती प्रदेश सांसद शैलेन्द्र बज्राचार्यया मू पाहाँसुइ न्ह्याःगु सहलह ज्याझ्वलय् समितिया नायः गौतमरत्न शाक्य नापंया पदाधिकारी व जात्रानाप स्वापू दुपिं गुथिया प्रतिनिधिपिनिगु ब्वति दुगु खः ।

सहलह ज्याझ्वलय् सिक्किम नेवाः गुथिया नायः निर्मल कुमार प्रधानं सिक्किमय् हनाच्वनागु इन्द्रजात्रायात सिक्किम सरकारं हे अपनत्व कया न्ह्यज्याःगु हुनिं आःया दिनय् छु गुकथं न्ह्यांवनेमाली धैगु बिषयसं सहलह यायेत नेपाः वयागु धयादिल । सिक्किम सरकारयापाखें प्रतिनिधित्व यानाःझाःम्ह सूर्य प्रधानं सिक्किम सरकार थःहे नेवाः समुदायया भाषा कला संस्कृतियात अझ व्यवस्थित यायेत नीति हे दयेकेगु पक्षय् दुगुलिं माःकथंया ग्वाहालि, छ्याता व हःपाःया नितिं सहलह यायेत समितिनाप स्वापू तःवयागु धयादिल ।

सहलह ज्याझ्वलय् मू पाहाँ बज्राचार्यं झी नेवाःत भौगोलिक रुपं न्ह्याथाय् च्वंसां थःगु कला, संस्कृति, संस्कार संरक्षण संवर्द्धन यायेत व थुकियात निरन्तरता बिइत लिचिले मज्यूगु धयादिल ।

ज्याझ्वलय् सिक्किम सरकारया मुख्यमन्त्री प्रेमसिंह तामाङयापाखें इन्द्रजात्रा व्यवस्थापन समितियात व इन्द्रजात्रा व्यवस्थापन समितिपाखें सिक्किम सरकारयात मतिनाया चिं लःल्हायेगु ज्या जूगु खः ।

सहलहलिपा सिक्किम सरकारया प्रतिनिधि व सिक्किम नेवाः गुथिया पदाधिकारी दुजःपिन्सं बसन्तपुरय् च्वंगु राजकीय कुमारीया दर्शन यानादीगु खः ।