सिक्किमय् नेवाःभाय् ब्वनांच्वंपिं ब्वनामिपिं किपू भ्रमणय्
जःलाखःला देय् भारतया सिक्किमय् च्वंगु राष्ट्रिय भाषा एवं संस्कृति बिद्यालय, गान्तोकय् नेपालभाषा (नेवाः भाय) ब्वना च्वंपिं ब्वनामिपिंसं थौं बुधवाः किपू भ्रमण यानादीगु दु । किपूया ब्यांचुलि साँस्कृतिक पुचःया नायः लक्ष्मीकुमार महर्जन 'उदास', किपू नगरपालिका वडा नं. १, २ व ३ या पुलांपिं वडाअध्यक्षपिं छसिकथं हर्ष महर्जन, रमेशमान डंगोल व राजेन्द्र महर्जनपिंसं लसकुस यानादीगु खः ।
लसकुसलिपा किपूया ऐतिहासिक व पूरातात्विक थायत चिलंच्व विहार, बाघ भैरव (आजुद्यः) व क्वाःच्व (उमामहेश्वर) देगः चाःहिलादीगु खः । किपूया थीथी विषयया बारे ब्याँचुलि साँस्कृतिक पुचःया नायः लक्ष्मीकुमार महर्जन 'उदास', छ्याञ्जे नरेन्द्र महर्जन 'NRD' व नेपालभाषा विज्ञ जीवन महर्जनपिंसं ध्वाथुइकादीगु खः । भ्रमण पुचःयात क्वाःच्वयच्वंगु टेम्पल भ्यू रेष्टुरेष्टय् नेवाः परम्परा कथं खेँय् सगंबियाः क्वखा क्वखायेका हनादीगु खः ।
विद्यालयया प्रमुख विकास प्रधान व शिक्षिका प्रज्वला प्रधानया नेतृत्वय् वःपिं नीम्हेसिया पुचः म्हिगः मंगलवाः येँय् थ्यंकादीगु खः ।
