नेवाः हाइकु सफू पिदन
बुद्ध दर्शन, ज्ञान, शिक्षायात मू बिषय दयेका ग्वसाःग्वःगु बौद्ध हाइकु साहित्य धेंधेंबल्लाकासाया त्याकामिपिन्त सिरपाः नापं दसिपौ लःल्हाःगु दु ।
६४ म्ह हाइजिनतयसं ब्वति कयादीगु धेंधेंबल्ला कासाय् बिमलप्रभा बज्राचार्य, मिलन शाक्य, रामेश्वर श्रेष्ठ जलन, रामेश्वर मिश्रण श्रेष्ठ व रिता महर्जन याना न्याम्ह उत्कृष्ट हाइजिन घोषणा जूगु खः । आनन्दसिद्धि तुलाधर, बद्रि बेदना, बुद्धलक्ष्मी बज्राचार्य, दिब्या ताम्राकार, प्रदीप आर. तुलाधर, राजु नापित, रिता महर्जन व तेजकृष्ण श्रेष्ठ याना ८म्ह हाजिनतयसं हःपा सिरपा त्याकादीगु खः । उत्कृष्ट व हःपा याना सिरपाः त्याकादीपिं १३म्हेसित नेपाल प्रज्ञाप्रतिष्ठानका उपकुलपति बिमल निभाः श्रेष्ठं सिरपा व दसिपौ लःल्हानादीगु खः ।
ज्याझ्वलय् धेंधेंबल्ला कासाय् दुथ्याःपिं हाइजिनतयगु झिपु हाइकु मध्ये उत्कृष्ट न्यापु हाइकु मुनाः पिथंगु “बौद्ध हाइकु” सफू नं चिखिफ्यने ज्या जूगु खः । ज्याझ्वलय उपकुलपति विमल निभाः, लुम्बिनी बौद्ध विश्वविद्यालयया निमित्त उपकुलपति तिलकराम आचार्य व डिन माणिकरत्न शाक्यं मंकाःकथं उगु सफूया चिखिफ्यने ज्या यानादीगु खः ।
नेवाः हाइकु ख्यः व लुम्विनी बौद्ध विश्वविद्यालय बौद्ध अध्ययन संकायया मंकाः ग्वसालय् जूगु धेंधेंबल्ला कासां नेपालमण्डलया बौद्ध इतिहास, सभ्यता, कला, संस्कृतिया अध्ययन अध्यापनय् ग्वाहालि व तिवः जुइमा धकाः बौद्ध हाइकु धेंधेंबल्लाकासा ग्वसाःग्वयागु नेवाः हाइकु ख्यःया कजि सुरेश प्रधानं जानकारी बियादिल ।
नेपाली साहित्य क्षेत्रय् बुलुहुं थाय् कयाच्वंगु साहित्यिक विधा हाइकु जूगु धयादिसें थ्व साहित्य क्षेत्रया चीधंगु स्वरुप जूगु नं कजि प्रधानं जानकारी बियादिल ।
धेंधेंबल्लाय् दुथ्यागु हाइकुयात प्रा.डा.बज्रराज शाक्य, डा. पुष्पराज राजकर्णिकार व ध्रुव मधिकर्मीया निर्णायक मण्डलं ल्यज्यायेगु ज्या यानादीगु खः ।
