जाह्वलाख्यलय् बुंगद्यःया याः न्यात, ११ गते बिहीवाः भोटो जात्रा
स्वनिगःया दक्कले ताःहाकःगु जात्रा बुंगद्यःया खः सालेगु जात्रा थौं सोमवाः क्वचाःगु दु । खः सालेगु लिपांगु न्हि (साइत स्वया) थौं यलया थति त्वालंनिसें जाह्वलाख्यः तक बुंगद्यःया खः साःगु खः ।
थति त्वालंनिसें जाह्वलाख्यः तक बुंगद्यःया खः सालेगु जात्रा येँया दक्षिण पश्चिम लागा किपूनिसें थक्वाः (न्हयगां) या जात्रा कथं कयातःगु दु । उकिं थुगु खः न्हयगांयापिंसं सालेगु चलन कथं थौंया थुगु खः सालेत किपू नगरपालिकाया प्रमुख राजकुमार नकःमिलिसें न्हयगांयापिंसं साःगु खः ।
किपू नगरपालिकाया प्रमुख नकःमिलिसें यल महानगरपालिकाया प्रमुख चिरीबाबु महर्जनपिंसं सालाः न्ह्याकूगु थौंया बुंगद्यः सालेगु जात्रा जाह्वलाख्यलय् दुगु गालय् लासेंलि थौंया याः न्याःगु खः ।
आः थनिं प्यन्हुखुन्हु वइगु ११ गते बिहिवाः जाह्वलाय् जात्रा (भोटो जात्रा) जुइगु जूगु दु । थ्व खुन्हु नेपाल सरकारं स्वनिगलय् सार्वजनिक विदा बीगु यानावयाच्वंगु दु ।
