नेपालभाषाया न्हूगु म्युूजिक भिडियो “याकः मिसाया छेँ खः झीगु किपू देयया प्यंगः थां” सार्वजनिक

स्वनिगःया ऐतिहासिक नेवाः बस्ति किपू व यलया स्वापू क्वातुइमा व क्वातुया तुं च्वनेमा धइगु आज्जु थौं मंगलवाः नेपालभाषाया छपू म्यूजिक भिडियो सार्वजनिक याःगु दु । थुगु निगू ऐतिहासिक नेवाः बस्तिदथुइ न्ह्यानाच्वंगु ऐतिहासिक अमूर्त संस्कृतियात निरन्तर न्ह्याकेगु वा मन्ह्याकेगु धइगु खँय् छुं ला न्ह्यःनिसें विवाद जुयाच्वंगुु इलय् संगीतया माध्यमं अझ स्वापू क्वातुयेमा धकाः “याकः मिसाया छेँ खः झीगु किपू देयया प्यंगः थां” धइगु छगू म्यूजिक भिडियो हे दयेका सार्वजनिक याःगु खः ।

स्वनिगःया दक्कले ताःहाकःगु जात्रा (बुंगद्यः) करुणामयया जात्रा थ्व इलय् यलय् न्ह्यानाच्वंगु दु । किवंदन्ति कथं उगु इलय् करुणामय थः यज्जु नापलायेत किपुलिइ वःगु जुयाच्वन । किपूया प्यंगः थामय् च्वंम्ह मिसायात दँयदसं करुणामयया जात्राबलय् स्वां ब्यूवयेगु बचं ब्यूगु हुनिं थ्यंमथ्यं १६०० दँ न्ह्यःनिसें स्वां तःवयेगु चलन थौं तक नं न्ह्यानाच्वंगु दनि । तर थुगुसी किपूया गःछेँ सुखी समाजं प्यंगः थामय् (करुणामयया स्वां तः वइगु थासय्) स्वां काइम्ह याकः मिसा व करुणामयया हे प्रतिमूर्ति पलिस्था यासेंलि स्वां तःवइपिं पाञ्जुपिंसं उगु प्रतिमूर्ति लिमकातले स्वां तःवयेमखु धइगु सार्वजनिक यायेवं किपू व यल दथुया स्वापुतिइ पंगः दंवःगु खः । थुगु हे विवादं यानां थुगु स्वापू मस्यनेमा धकाः लोककवि राजभाई जकःमिं बिहाँचुलिया लोक लसय् म्येँ चिनां छायाँङ्कन याना थःगु हे यूट्युव च्यानल Rajbhai Jakami पाखें सार्वजनिक याःगु खः ।

ज्यापु महागुथि, किपू नगर समितिं पिथंगु थुगु म्यूजिक भिडियोय् लोकंह्वाःपिं म्येँ हालामिपिं सतिश महर्जन, रिता महर्जन, मथुरा महर्जन, दिपा महर्जन, रत्नशोभा महर्जन, कृष्णमान डंगोलपिंसं सः बियादीगु खःसा म्यूजिक भिडियोय् सकलें म्येँ हालामिपिंलिसें लोकंह्वाःपिं प्याखँम्वः हिराशोभा महर्जन (हिसिला), भगवति महर्जन, लिजला, नायरा, आर्या व जला म्ह्यायमचा पुचःपिंसं थःगु प्रतिभा न्ह्यब्वयादीगु दु ।
थुगु म्यूजिक भिडियोयात प्रताप महर्जन व राजेश शाक्यं प्यंगः थांलिसें किपूया हे थीथी थासय् छायाँङ्कन यानादीगु खः । राजेश शाक्यं हे सम्पादन यानादीगु थुगु म्यूजिक भिडियोयात ललेन्द्र शाक्यं निर्देशन यानादीगु खः ।

थुगु म्यूजिक भिडियो "याकः मिसाया छेँ खः झीगु किपू देयया प्यंगः थां" क्वय् स्वयादीफइ ।

More Stories Like this