संसदया ताल्ला अधिवेशन कन्हसनिसें
सङ्घीय संसद् (प्रतिनिधि व राष्ट्रियसभा) या ताल्ला अधिवेशन कन्हय् आइतवाः निसें न्ह्याइगु जूगु दु ।
राष्ट्रपति रामचन्द्र पौडेलं सःतादीकथं अधिवेशन कन्हय् सनिलया ४ ताः इलय् बानेश्वरया संसद् भवनय् च्वनीगु खः । सङ्घीय संसद् सचिवालयया कथं अधिवेशनया न्हापांगु बैठकय् सम्भावित कार्यसूचीइ सभामुखं राष्ट्रपतिपाखें वःगु अधिवेशन सःतूगु पौ व राष्ट्रपतिया ज्याकूपाखें वःगु मन्त्री पदय् नियुक्तिसम्बन्धी पौ ब्वना न्यंकीगु ज्याझ्वः दु ।
अथेहे कन्हयया बैठकय् सभामुखं थः मलाइबलय् बैठकया अध्यक्षता यायेत दुजःया मनोनयन याइगु ज्याझ्वः दु । अथेहे बैठकय् कानुन, न्याय तथा संसदीय मामिलामन्त्री धनराज गुरुङं ‘मुलुकी संहितासम्बन्धी छुं छुं नेपाल ऐनयात संशोधन यायेगु अध्यादेश, २०८०’ न्ह्यब्वइगु ज्याझ्वः दु ।
बैठकया लिपांगु इलय् अर्थमन्त्री डा. प्रकाशशरण महतं, ‘आर्थिक दँ २०८०/८१ या नितिं विनियोजित विधेयकया थीथी सिद्धान्त व प्राथमिकतासम्बन्धी (कर प्रस्तावबाहेक) य् सहलह यायेगु धइगु प्रस्ताव न्ह्यब्वइगु ज्याझ्वः दु ।
थौं च्वंगु सत्ता गठबन्धनया बैठकय् सरकारया वइगु बजेट व नीति तथा कार्यक्रमसम्बन्धी सहलह जूगु खः । थुगु अधिवेशनय् नेपाल सरकारया वार्षिक नीति तथा कार्यक्रम आय व्यायया विवरण (बजेट) न्ह्यब्वइगु खः ।
