रास्वपां सरकारया बियातःगु समर्थन लितकाल
राष्ट्रिय स्वतन्त्र पार्टी (रास्वपां) सरकारयात बियातःगु समर्थन लित काःगु दु । उगु पार्टीया केन्द्रीय समिति व संसदीय दलया मंकाः बैठकं सरकारयात बियातःगु समर्थन लित कयाः प्रतिपक्षय् च्वनेगु निर्णय याःगु खः ।
पार्टीया सभापति रवि लामिछानें बैठक धुंकाः ग्वसाःग्वःगु पत्रकार सम्मेलनय् धयादिल , “जिमिसं जनभावना व जनमतया कदर यायेमाःगु दु, वंगुु उपनिर्वाचनं जिमित ब्यूगु म्यान्डेट हे सशक्त प्रतिपक्षया भूमिका म्हिती धाःगु खः , उकिं आः उकथं ह न्ह्यां वनेगु जुइ ।” सभापति लामिछानें आः वइगु दिनय् पार्टीया सङ्गठन विस्तार व रचनात्मक प्रतिपक्षया रूपं ज्या यायेगु ध्वाथुइका दिल ।
पत्रकारतय्सं न्यंगु न्ह्यसःया लिसःबीगु झ्वलय् पार्टीका सभापति लामिछानें धयादिल, “गठबन्धन दयेका, अस्थिर याना जिपिं च्वनेमखु, सरकारं लँ त्वःफिकूगु इलय् छगू राजनीतिक दलं अवश्य नं पलाः ल्ह्वनी, तर सरकार दयेकेगु व क्वःथलेगु स्वया नं रचनात्मक प्रतिपक्षया रूपं न्ह्यांवनेत जिमिगु ध्यान केन्द्रित जुइ।”
वयकलं प्रदेश संरचना नेता व कार्यकर्ता व्यवस्थापन यायेगु थाय् जक जूगु धयादिसें प्रदेश संरचनाबारे सहलह यायेमाःगु धयादिल । थ्वहे व्यवस्था दुने नं जनताया अवस्था हिले फइगु वय्कःया धापू दु ।
सभापति लामिछानें वर्तमान सरकारं नक्कली शरणार्थी काण्डय् दुथ्याःपिंलिसें भ्रष्टाचारय् दुथ्याःपिंत कारबाही याःगुयात सुभाय् बियादिसें भ्रष्टाचारया मुद्दाय् दुथ्याःपिं मेपिं मनूतय्त नं कारबाहीया लागि इनाप यायेगु धयादिल । पार्टीया केन्द्रीय महाधिवेशनस्वयां न्ह्यः पार्टीया सांसदपित केन्द्रीय समितिइ दुथ्याके वयकःया धापूदु।
