बजेट तयारीया लागि पुलांपिं अर्थमन्त्रीपिंलिसे अर्थमन्त्रीया सहलह
अर्थमन्त्री डा. प्रकाशशरण महतं आः वइगु आर्थिक दँया लागि बजेट दयेकेत पुलांपिं अर्थमन्त्रीपिंलिसें सहलह ब्याकूगु दु । पुलांपिं अर्थमन्त्रीपिंसं व्यवहारिक बजेट दयेकेत, खर्च म्हो यायेत व न्हूगु आयोजना मतनेत सुझाव बियादीगु दु ।
सहलहस पुलांपिं अर्थ मन्त्रीपिं ज्ञानेन्द्रबहादुर कार्की, डा. प्रकाशचन्द्र लोहनी, डा. युवराज खतिवडा, विष्णु पौडेल व सुरेन्द्र पाण्डें ब्वति कयादीगु खः । सहलहस अर्थमन्त्री डा. महतं आःया थाकूगु ईयात ध्वाथुइके कथं बजेट दयेकेत थःपिंसं ज्या यानाच्वनागु व उकिया लागि सकलपाखें ग्वहालि दइ धकाः भलसा कयागु धयादिल ।
वयकलं पूर्वानुमाया तुलनाय् यक्व हे म्हो जक राजश्व म्हःगु इलय् खर्च म्हो यायेगु, प्राथमिकता दुगु आयोजनायात जक बजेट फ्यायेगु व नीजि क्षेत्रया आत्म विश्वास अप्वयेकेत थःपिं न्ह्यांवनाच्वनागु जानकारी बियादिल ।
वयकलं लिच्व मबीगु आयोजनाय् लाय् मतयेगु व क्व:छ्यूगु इलय् हे ज्या क्वचायेकेगु, याकनं हे कार्यान्वयन याये फइगु पूर्वाधार आयोजनायात प्राथमिकताय् तयेगु धयादिल । अर्थमन्त्री महतं मेपिं पुलांपिं अर्थ मन्त्रीपिंपाखें समेत मदिक्क सुझाव दइगु आशा प्वंकादिल ।
