अनलाइनपाखें गुद्वःम्हेसिनं काल “टिम्स कार्ड”
सरकारं पदयात्राय् वनीपिं विदेशी पर्यटकपिंत पदयात्री सूचना व्यवस्थापन प्रणाली “टिम्स कार्ड” व ट्रेकिङ गाईड अनिवार्य यासेंलि अनलाइनपाखें “टिम्स कार्ड” काइपिं पदयात्रीत अप्वयावंगु दु ।
नेपाल पर्यटन वोर्ड, ट्रेकिङ एजेन्सीज् एशोसियसन अफ नेपाल (टान) व पर्यटन क्षेत्रय् दुथ्याःपिं मजदुरपिनिगु मंकाः संगठनया कुतलय् नेपाः चाःह्यूवइपिं विदेशी पर्यटकपिंत “टिम्स कार्ड” व गाईड मतःसे पदयात्राय् वने मदइगु नियम लागु यासेंलि अनलाईनपाखे “टिम्स कार्ड” काइपिं पदयात्रीतय् ल्याः अप्वया वःगु खः ।
टान व पर्यटन वोर्डं मंकाः कथं बियाच्वंगु “टिम्स कार्ड”यात वंगुु अप्रिल १ निसें अनलाईनपाखें बीगु याःगु खःसा आःतक गुद्वः व स्वसः व नीम्हेसिनं “टिम्स कार्ड” काये धुंकूगु दु । अथेहे थ्वहे ई तकया दुने द्वःछि व न्यासलं मयाक ट्रेकिङ कम्पनी टिम्सय् दुथ्याःगु दु ।
सरकारं “टिम्स कार्ड” काःगुु वापत पदयात्रीयाके निद्वः तका दां शुल्क कयाच्वंगु खः । टानया अध्यक्ष नीलहरि बाँस्तोलां पर्यटकयात अःपुइमा धकाः अनलाईनपाखें “टिम्स कार्ड” बियागु धयादिल । पदयात्रायात सुरक्षित, भरपर्दाे व व्यवस्थित दयेकेया नितिं सरकारं अनिवार्य गाईड व “टिम्स कार्ड”या व्यवस्था याःगु धयादिल ।
अध्यक्ष बाँस्तोलां दँय्दसं छगू दर्जन स्वयां अप्वः पदयात्रीपिं सुचं मब्यूसे याकःचा पदयात्राय् वना तंगु धयादिसें पर्यटकया सुरक्षाया लागिं हे गाईड अनिवार्य यायेमाःगु धयादिल । पर्यटकपिं याकःचा पदयात्राय् वना व तंगुलिं नेपाः पदयात्राया लागि सुरक्षित गन्तव्य मजूगु थेंजाःगु सन्देश विदेशय् वंगुलिं थ्वयात ध्वाथुइकेमाःगु अध्यक्ष बाँस्तोलां धयादिल ।
“टिम्स कार्ड” व गाईड अनिवार्य यासेंलि पर्यटक सुरक्षित जुइगुलिसें नेपाली पर्यटक गाईडपिंत ज्या दइगु, कम्पनीपाखें वंसा कम्पनीं राज्ययात राजस्व पुलीगु जूगुलिं दक्वसितं हे फाइदा जुइगु टानं धाःगु दु ।
