किपुलिइ शहीद दिवस हन
दँयदसं थें किपुलिइ शहीद दिवस सोमवाः हंगु दु । शहीद स्मृति व्यवस्थापन समितिया ग्वसालय जूगु ज्याझ्वलय् किपू नगरपालिका वडा नं. ३ खाःसिबजार च्वंगु मभिं पुखुलिइ पलिस्था यानातःगु शहीदया झ्वाताय् स्वांमा क्वखायेकाः र्याली चाःह्यूगु खः । र्याली खाःसिं शुरूजुया किपू चाःहिलाः पाँगा जुयाः नगमय् क्वचायेकूगु खः ।
शहीदया झ्वाताय् स्वांमा क्वखायेकाः श्रद्धाञ्जली बीत येँ क्षेत्र नं. १० या सांसद माननीय राजेन्द्र कुमार के.सी., वागमती प्रदेश सांसद माननीय पुकार महर्जन, पुलांम्ह मन्त्री कृष्णगोपाल श्रेष्ठ, किपू नगरपालिकाया प्रमुख राजकुमार नकःमि, उप–प्रमुख शुभलक्ष्मी शाक्य (सुनिता), निर्वतमान नगर प्रमुख रमेश महर्जन, निवर्तमान उप–प्रमुख सरस्वती खड्कालिसें सकल जनप्रतिनिधिपिं झायादीगु खः ।
व्यवस्थापन समितिया अध्यक्ष सिद्धिकुमार मानन्धरया सभापतित्वय् जूगु स्वामां क्वखायेके ज्याझ्वः शहीदया लुमन्तिइ १ मिनेट मौन धारण याःगुखःसा कलाकारपिंसं शहीदया लुमन्तिइ म्येँ हालादीगु खः ।
३३ क्वःगु थुगु शहीद दिवसया झ्वलय् न्हापांखुशी नेपालभाषा टाइम्सय् “किपू शहीद विशेष तँसा पौ” नं पिथंगु खः । किपू नगर चाःह्यूगु र्याली बाघभैरव थ्यंकाः उप–प्रमुख व सकलें वडाअध्यक्षपिंलिसें व्यवस्थापन समितिया जःपिंसं उगु तँसापौया उलेज्या यानादीगु खः ।
वि.संं २०४६ सालको ऐतिहासिक जनआन्दोलनया झ्वलय् चैत २० गते गोलीं कयाः किपूया लनबहादुर महर्जन, हिराकाजी महर्जन, राजमान माली र राजेन्द्र महर्जनपिंसं शहादत प्राप्त याःगु खः । उगु हे न्हिया लुमन्तिइ दँयदसं शहीद दिवस हनावयाच्वंगु खः ।
र्यालीइ किपूया थीथी स्कूल, कलेज, राजनितिक दल, संघसंस्था व सर्वसाधारणपिनिगु ब्वति दुगु खः ।
News Location:
