नेपालभाषाया चीहा संकिपा “उच्च शिक्षा”
नेपालभाषाया न्हूगु चीहा संकिपा “उच्च शिक्षा” पिदंगु दु । मगन ईन्टरटेनमेण्टया ग्वसालय् पिदंगु थुगु चीहा संकिपाया बारे वंगु माघ ७ गते छगू पत्रकार सम्मेलन याना जानकारी ब्यूगु खःसा ११ गते किपूया कीर्तिपुर सिनेप्लेक्सय् प्रिमियर शो याःगु व माघ १२ गते श्रीपञ्चमि खुन्हु थःगु यूट्यूव च्यानलय् अपलोडयाना सार्वजनिक याःगु खः ।
उच्च शिक्षा ताःलाकेया नितिं धकाः थःगु छेँ बुँ हे बरःतया छगू कथं जःलाखःलापिंत क्यनेथें याना कतःदेय् वनेगु फेशन थें जुयाच्वंगु समस्यायात चीहा संकिपामा माध्यम मगन ईन्टरटनमेण्टया अध्यक्षलिसें च्वमि व स्यनामी रजिन महर्जनं बांलाःगु उलाःब्यूगु दु ।
थ्यंमथ्यं १८ गू मिनेटया थुगु संकिपाय् मू कलाकारया कथं अबुया भूमिकाय् भाजु लक्ष्मीकुमार महर्जन खनेदुसा काय्या भूमिकाय् क्रिशल श्रेष्ठ अथेहे सुदिप भजु, कृष्णभक्त महर्जन, विनोद महर्जन, आयुष महर्जनआदिपिंसं अभिनय यानातःगु थुगु संकिपा विक्रम महर्जनं सहायक निर्देशन यानाब्यूगु खः । रामचन्द्र महर्जन व जमुना महर्जनं निर्माण यानादीगु थुगु चीहा संकिपायात उत्तम हुमागाईं छाँयाङ्कनयानादीगु खः ।
थुगु संकिपा उच्च शिक्षा क्वय् स्वयादीफइ -
News Location:
