येँया उप-प्रमुख डंगोलयात किपुलिइ हन

येँ महानगरपालिकाया उप–प्रमुख सुनिता डंगोलयात शनिवाः किपुलिइ हंगु दु । वंगु दँय् किपू नगरपालिकाया थीथी वडाय् जूगु उद्घोषण तालिम बियादीम्ह उप–प्रमुख डंगोलयात तालिमय् ब्वति कयादीपिं किपू नगरपालिका वडा नं. १ व ३ या प्रशिक्षार्थिपिंसं हिल टाउन स्कुलय् छगू ज्याझ्वः याना हनादीगु खः ।

येँ महानगरपालिकाया उप–प्रमुख थेंजाःगु गरिमामय पदय् त्याकादीगुलिं प्रशिक्षार्थिपिंसं बधाइ व भिंतुना बियादिसें सिन्हः तिकाः खादा क्वखायेका हनादीगु खः । प्रशिक्षार्थिपिंसं थः गुरुमां त्याःगुलिं लसता प्वंकादिसें थीथी दोहलपा नं देछायादीगु खः ।

ज्याझ्वलय् प्रशिक्षार्थिपिंसं युवातय् प्रतिनिधित्व यासें येँ महानगरपालिकाया नेतृत्वय् दुगुलिं महानगरपालिकाया विकासया ज्याझवलय् युवातय्त ब्वतिकायेकादीत सुझाव बियादिल । लिसें किपूया युवातय्त नं ब्वतिकायेके कथं ह्वःताः चूलाकादीत इनाप यानादिल ।

किपू नगरपालिकाया निवर्तमान उप–प्रमुख सरस्वती खड्कां येँ महानगरपालिका व किपू नगरपालिका दथुइ अन्तर नगरपालिका साझेदारी ज्याझ्वः कथं किपू नगरपालिकायात ग्वहालि यानाच्वंगु न्ह्यथनादिसें आः थ्व पालय् नं उकथंया ग्वहालियात निरन्तरता बियादीत इनाप यानादिल । निवर्तमान नगर प्रमुख रमेश महर्जनं सुनितायात मिस नेवाः जुसांनिसें हे म्हस्यूगु लुमंकादिसें किपू नगरपालिकाया थीथी ज्याय् ग्वहालि यानादीगुलिं सुभाय् बियादिल । निवर्तमान नगर प्रमुख महर्जनं सुनिता न्हापा पदय् मदुबलय् हे नं नेवाः ख्यलय् ज्वःमदुगु योगदान यानाच्वनादीम्ह व रञ्जना लिपिया प्रचार प्रसारया ज्याय् क्यालिजात्राया नामं अभियान हे चलेयानाजूम्ह जूगुलिं आः पदय् दुबलय् नं अझ थ्वयात च्वन्ह्याकायंकेमाःगु खँय् बःबियादिल । निवर्तमान नगर प्रमुख महर्जनं येँदेसय् सकारात्मक ह्यूपा हयेगु ज्याय् बुलुहुँ ताःलानाच्वंगु धयादिसें थुकी जनतां साथ ब्यूगुलिं सम्भव जूगु धयादिल । थुकिया सुरु बँपसः चीकेगु ज्याय् ताःलानाच्वंगु उल्लेख यानादिसें न्हापा अथे बँपसः चीकेबलय् महानगरपालिका याकःचा जक जूइगुलिं थाकुयाच्वंगु जूसा आः थ्व विषयस जनतां नं साथ बियाच्वंगुलिं थ्व बँपसः चीकेगु ज्या सुथांलानाच्वंगु व अथेहे आः फोहोरया व्यवस्थापन नं थुकथं हे ताःलाइ व ताःलायेमा धकाः कामनायानादिल ।

ज्याझ्वलय् किपू नगरपालिकाया वडा नं. १, २ व ३ या निवर्तमान वडाअध्यक्षपिं हर्ष महर्जन, रमेशमान डंगोल व राजेन्द्र महर्जनपिंसं नं डंगोलयात भिंतुना व बधाइ बियादीगु खः ।

मूपाहाँ थासं न्ववानादिसें डंगोलं थःयात बियादीगु भिंतुना व बधाइया लागि सकलसित सुभाय् बियादिलसा प्रशिक्षार्थिपिंत थःम्हसिनं स्यनाकथं उद्घोषण कला क्षेत्रय् मदिक्क न्ह्यांवनेत इनाप नं यानादिल । थः पदीय दायित्व कथं न्हिं न्हिं नापलायेमखंसां न्ह्याबलें नापं हे दुगु विश्वास बियादिसें डंगोलं येँ महानगरपालिकाय् उप–प्रमुखजुयाः दुहाँवनागु न्याला दुगु ईयात विश्वविद्यालय तायेका यक्व खँ सयेकागु न्ह्यथनादिल । उप–प्रमुख डंगोलं येँ महानगरपालिकाय् ज्या यायेत अःपु मजूगु धयादिसें असम्भव नं मजूगु न्ह्यथनादिल । थःगु कार्यकालय् येँदेय् विकास यायेगु ज्याय् थीथी योजनात न्ह्यब्वयायच्वनागु धयादिसें सकसिनं ग्वहालि व हःपा बियादीत नं इनाप यानादिल ।

ज्याझ्वः किपू नगरपालिका सामाजिक विकास शाखाया प्रमुख लिसें वडा नं. १ य् जूगु उद्घोषण तालिमया प्रशिक्षार्थि अनुज प्रधानं न्ह्याकादीगु खः । शनिवाः हे उप–प्रमुख डंगोलयात किपू नगरपालिका वडा नं. ५ व ८ य् उद्घोषण तालिमय् ब्वति कयादीपिं प्रशिक्षार्थिपिंसं पांगाय् बधाइ व भिंतुना देछायेगु ज्याझ्वः याःगु खः ।

News Location: