नेवाः मन्त्री जुयाः नं ज्या यायेफु धकाः क्यनेमाःगु दु : मन्त्री श्रेष्ठ

“नेवाःत सरकारय् वनेगु म्हो हे जक जुयाच्वंगुलिं सरकारय् दुपिं नेवाःतय्सं ज्या नं याः व यायेफु धइगु क्यनेमाःगु दु । उकीया लागि थः धयापिं सकलें नेवाःतय्सं माःगु ग्वहालि यानादीत इनाप दु ।” थ्व खँ नकतिनि नेपाल सरकारया संस्कृति पर्यटन व नागरिक उड्डयन मन्त्री जुयादीम्ह माननीय जीवनराम श्रेष्ठ धयादीगु खः । नेवाः पत्रकार राष्ट्रिय दबू, येँ कचां बुधवाः ग्वसाः ग्वयाः माननीय मन्त्रीयात हनादीगु छगू ज्याझ्वलय् माननीय मन्त्रीं थ्व खँ कनादीगु खः ।

नेवाः परम्पराकथं खेँय् सगं बियाः थःगु हे ज्याकू लखतीर्थय् हनादीगु ज्याझ्वलय् माननीय मन्त्री श्रेष्ठं वइगु निर्वाचनया ई तक जक थः मन्त्री जुइगु ई जूगु हुनिं ई मदुगुलिं चीचाहाकःगु इलय् नं खनेदयेक ज्या यायेमाःगु धयादिल । स्वनिगःया पहिचान धयागु हे नेवाः सम्पदा खःगु व थ्व सम्पदा देय्या हे धरोहर जूगु धयादिसें माननीय मन्त्री श्रेष्ठं थुकियात माःकथं संरक्षण याना ल्यंकाःतयेगु ज्या यायेगु खँ कनादिल । स्वनिगलय् पर्यटकतय्त आकर्षित यायेगु धइगु हे नेवाः संस्कृति व सम्पदा त क्यना जूगुलिं थुकीयात व्यवस्थित याना यंकेमाःगु उकिया लागिं थः मन्त्रीजुयाः न्हापांगु निर्णय हे पर्यटन क्षेत्रयात पुनस्थापित यायेगु ज्या यायेगु व स्वनिगःया सम्पदात ल्यंकाः तयेया निति सम्पदा मार्ग दयेकेगु क्वःछिनागु धयादिल । अझ मन्त्रालयं येँय् यल व ख्वप स्वाइगु छगू सम्पदा पद मार्ग दयेकेत छगू अध्ययन टोलि हे दयेका अध्ययन यानाच्वंगु नं जानकारी बियादिल । थथे जुलकि स्वनिगलय् च्वंपिं नेवाःतय्त लजगाः दइगुलि ग्वहालि जुइगु धयादिसें माननीय मन्त्री श्रेष्ठं थःगु मन्त्रालय् अन्तर्गतया जात्रा पर्वयात फक्व ग्वहालि याना निरन्तरता बीगु प्रतिवद्धता प्वंकादिल ।

ज्याझ्वलय् ग्वसाः खलः येँ जिल्ला शाखा ज्याकू दुगु वडा, वडा नं। १५ या नं हाकनं निर्वाचित जुयादीम्ह वडा अध्यक्ष इश्वरमान डंगोल, वडा सदस्यपिं मैंयालक्ष्मी महर्जन, अवसरा खत्री, बिजु श्रेष्ठ व रिता मिजारयात नं नेवाः परम्पराकथं खेँय् सगंबियाः कार्यकाल सुथां लायेमा धकाः भिंतुना बियादिसें हनादीगु खः ।

ग्वसाः खलः नेवाः पत्रकार राष्ट्रिय दबू,येँ कचाया नायः अर्विन्द्रमान सिंहया सभापतित्वय् जूगु हना ज्याझ्वलय् सभापति सिंहं वडाया सकल जःपिं व माननीय मन्त्रीयात भिंतुना बियादिसें न्हापा नं ग्वहालि यानाच्वंगु न्ह्यथनादिल । आः नं नेवाः पत्रकार राष्ट्रिय दबूपाखें माःगु ग्वहालि यायेगु धयादिसें सहकार्य याना ज्या यायेफइगु न्ह्यथना दिल । ज्याझ्वः ग्वसाः खलःया छ्याञ्जे रत्न मनं न्ह्याकादीगु खः ।