नेपालभाषाया म्यूजिक भिडियो "व मनू, सु मनू?" सार्वजनिक (भिडियो सहित)

ऐतिहासिक नगर किपुलिइ थःगु जीवन फुकूम्ह छम्ह साधारणम्ह भरियाया बारे दयेकूगु नेपालभाषाया म्यूजिक भिडियो “व मनू, सु मनू ?” सोमवाः प्रिमियर शो याना सार्वजनिक याःगु दु । मगन ईन्टरटेनमेण्टया ग्वसालय् किपूया कीर्तिपुर सिनेप्लेक्सय् वरिष्ठ कलाकार मदनदास श्रेष्ठया मूपाहांसुइ थुगु नेपालभाषाया म्यूजिक भिडियो सार्वजनिक याःगु खः ।

थ्यंमथ्यं छगू दशकत्या न्ह्यः किपुलिइ भरिया ज्या यानाच्वंम्ह विजय (छम्ह सत्य पात्र) सुनां नं सितिकं ब्यूगु मकासे थःम्हं हे ज्या याना नयाच्वंम्ह, म्हय् झुत्रु झुत्रु लं फिना चाःहिलाच्वंम्ह छम्ह शिक्षितम्ह भरियाया जीवनया बारे दयेकूगु थुगु म्यूजिक भिडियोय् विजयया भूमिकाय् लोकंह्वाःम्ह कलाकार लक्ष्मीकुमार महर्जन “उदासं” थःगु अभिनय न्ह्यब्वःगु खः । किपुमिपिंसं विजय धकाः म्हस्यूम्ह उम्ह मनू धात्थें गन च्वंम्ह व गनं वःम्ह सुनांनं स्यूगु मखु । राजा महाराजा वा सुं नांजाःपिं नेता वा परम्परागत साहू महाजन, धनी वा सर्वसाधारण गरीवपिनिगु विषयबस्तुयात जक कःघाना दयेकीगु संकिपाया सिबें बिस्कं जुइक छम्ह साधारणम्ह भरिया “विजय”या विषयस दयेकूगु थुगु म्यूजिक भिडियोय् उम्ह भरियाया पात्रय् थःत ब्वयेदुगुलिं लयेतायादिसें मू कलाकार उदासं निर्माण पुचः व निर्देशकयात सुभाय् बियादिल ।

मगन ईन्टरटेनमेण्टया अध्यक्ष लिसें निर्देशक रजिन महर्जनं चीहाकःगु इलय् नं थुगु म्यूजिक भिडियो दयेके क्वचायेके खंगुलिं सकलें कलाकारपिंलिसें ग्वहालिमिपिंत सुभाय् देछायादिलसा थुगु म्ये दयेकेगु बिचाः वःगुनिसें म्यूजिक भिडियो देयेकेगुतकया बारे ध्वाथुइकादिल ।

किपू नगरपालिकाया निवर्तमान प्रमुख रमेश महर्जनं किपुलिइ जीवन पानावंम्ह छम्ह साधारण भरियाया बारे दयेकूगु थुगु म्यूजिक भिडियोय् मू पात्र लक्ष्मीकुमार महर्जन उदासया अभिनय जीवन्त जूगु धयादिल । कलाकार उदासयात कला क्षेत्रय् हयेगु नितिं थःगु योगदान दुगु उल्लेखयानादिसें निवर्तमान नगर प्रमुख महर्जनं कलाकार उदासया अभिनयं थः गौरवान्वित जुयागु धयादिल ।

ज्याझ्वलय मू पाहाँ वरिष्ठ कलाकार श्रेष्ठं नेपलाभाषाया बांलाःगु म्यूजिक भिडियो देयेकूगुलिं सकलसित सुभाय् बियादिल । मूपाहाँ श्रेष्ठं म्यूजिक भिडियोय् सकलें कलाकारं कुंखिनथाय् मदयेक बांलाःक अभिनय याःगु व थुगु म्युजिक भिडियो थःतः यक्व हे बांलाः ताःगु न्ह्यथनादिल ।

६ मिनेट १९ सेकेण्डया थुगु म्यूजिक भिडियोया म्येँ व लय् भुवन महर्जनया खःसा संगीत संयोजन सुरेन्द्र श्रेष्ठं यानादीगु खः । राजेन्द्र डंगोलं हालादीगु थुगु म्येँया म्यूजिक भिडियोय् देवेन्द्र महर्जन, बुद्धलक्ष्मी महर्जन, नरेन्द्र महर्जन, ज्ञानी शोभा महर्जन, धन बहादुर महर्जनलगायतं अभिनय यानादीगु थुगु म्युजिक भिडियोया कलर ग्रेडिङ्ग सञ्जिवरत्न शाक्यं, कला निर्देशन रेलिजा श्रेष्ठं यानादीगु खःसा निर्देशनय् विक्रम महर्जनं ग्वहालि यानादीगु खः । नेपालभाषाय् दयेकीगु परम्परागत श्रव्य दृष्यया ज्वलंसिबें बिस्कं शैलिं थुगु म्यूजिक भिडियो दयेकागु निर्देशकलिसें छायाँकार रजिन महर्जनं जानकारी बियादीगु दु ।

थुगु म्यूजिक भिडियो “व मनू सु मनू ?” मगन ईन्टरटेनमेण्टया यूट्यूव च्यानलय् नं छक्वलं सार्वजनिक याःगु खःसा ज्याझ्वलय् कलाकारलिसें ग्वहालिमिपिंत मतिनाया चिं लःल्हानाब्यूगु खः । ज्याझ्वलय् आपाःलं संकिपाकःमिंपिंलिसें पत्रकारपिनि ब्वति दुगु खः ।

थुगु म्यूजिक भिडियो “व मनू सु मनू ? क्वय् स्वयादीफइ ।