मांभायया पत्रकारिता गोष्ठी
माभासं न्ह्याकाच्वंगु पत्रकारिताय् थौंया अवस्था विषयस थौं आइतवाः छगू गोष्ठी जूगु दु । येँया विशालबजारय् च्वंगु बेन्टोय् जूगु थुगु गोष्ठीया मूपाहाँ येँ महानगरपालिकाया उप–प्रमुख सुनिता डंगोलं उलेज्या यानादीगु खः ।
ज्याझ्वःया उलेज्या यानादिसें उप–प्रमुख डंगोलं मांभासं पत्रकारिताया यानाच्वंगु च्वछायेबहःजू धयादिसें भाय् नापनापं लिपिया नं विकास यायेमाःगु खँय् बः बियादिल । गुलिखे मनूतयसं भाय् व लिपि बिस्कं धकाः थुइकेगु यानाच्वंगुलिं अथे मखुसे भाय् व लिपि नापनापं यंकेमाःगु धयादिल । लिपि सुन्दरीया उपनामं नांजाःम्ह उप–प्रमुख डंगोलं पत्रकारिता ख्यलय् नं परम्परागत बिचाःयात हाचां गायाः न्हूगु कथं न्ह्यांवनेमाःगु धयादिल । उप–प्रमुख डंगोलं येँ महानगरपालिकां वंगु दँनिसें स्थनीय पाठ्यक्रम लागु याःगु तसकं बांलाःगु ज्या जूगुलिं माःगु ग्वहालियानां थुकीयात मद्दिक्क न्ह्याकायंकेगु जुइ धयादिल ।
ज्याझ्वलय् भाजु राकेश महर्जनं च्वयादीगु व नेवाः पत्रकार राष्ट्रिय दबू, येँ कचां पिथंगु पत्रकारिताया विषयया नेपालभाषाया स्नातक तहया पाठ्यक्रमय् दुथ्याःगु “आम सञ्चार व नेपालभाषाया पत्रकारिता” सफूया नं मू पाहाँ उप–प्रमुख डंगोललिसें पाहाँपिं सकसिनं मंकाः कथं चिखिफ्यनादीगु खःसा पत्रकार मनोजरत्न शाहीं छायाँङ्कन व निर्देशन यानादीगु विश्व सम्पदा धलखय् लाःगु “स्वयम्भु”या वृत्तचित्रया नं उप–प्रमुख डंगोलं सार्वजनिक यानादीगु खः ।
ज्याझ्वलय् नेपालभाषा, मैथिलि, लिम्बू, तामाङ, राजवंशी, मेचे, संस्कृत, शेर्पा, थारु आदिसहित झिंन्यागू भायया पत्रकारिताया अवस्थाबारे कार्यपत्र न्ह्यब्वःगु खः ।
नेवाः पत्रकार राष्ट्रिय दबू, येँ कचाया ग्वसालय् जूगु ज्याझ्वः ग्वसाः खलःया नायः अर्बिन्द्रनमान सिंहया सभापतित्वय् जूगु खःसा सुष्मा महर्जनं ज्याझ्व: न्ह्याकादीगु खः ।
News Location:
