आधारभूत पत्रकारिता क्षमता अभिवृद्धि तालिम क्वचाल

नेवाः पत्रकार राष्ट्रिय दबू, येँ कचाया ग्वसालय् न्ह्यानाच्वंगु १५ न्हुया आधारभूत पत्रकारिता क्षमता अभिवृद्धि तालिम आइतवाः क्वचाःगु दु ।

तालिम क्वचायेके ज्याझ्वलय् ब्वतिकयादीपिं प्रशिक्षार्थीपिंत मू पाहाँ आदिवासी जनजाति उत्थान राष्ट्रिय प्रतिष्ठानया न्वकू गोकुल प्रसाद घर्तिं दसि पौ लःल्हानादीगु खः । तालिमय् ब्वति कयादीपिंत दसि पौ लःल्हानादिसें मू पाहाँ घर्तिं नेपाःया संविधानं बियातःगु हक अधिकारयात पत्रकारितामार्फत छ्यलाः सत्यतथ्य खँ पितबिया जनतातयत सुसूचित यायेमाःगु धयादिल । मू पाहाँ घर्तिं सकल प्रशिक्षार्थीपिंत पत्रकारिता ख्यलय् मदिक्क न्ह्यांवनेत नं इनाप यानादिल ।

ज्याझ्व:या पाहाँ आदिवासी जनजाति महासंघया अध्यक्ष गेल्जे लामा शेर्पां पत्रकारतय्सं इमान्दार जुया पत्रकारिता यायेमाःगु खँय् बःबियादिल ।

ज्याझ्वलय् तालिमया मू प्रशिक्षक व नेपालभाषा टाइम्सया सम्पादक सुरेश किरण मानन्धरं तालिम ज्वःछि सयेकागु खँ त आः व्यवहारय् छ्यले माःगु धयादिसें तालिम ज्याझ्वः क्वचाःसां पत्रकारिता यायेगु ज्याया नी (सुरु) जूगु धयादिल ।

ज्याझ्वलय् प्रशिक्षार्थीपिनिपाखें सुनिता तुलाधर शिल्पकारं तालिम तसकं च्वछायेबहःजूगु व थुगु तालिमय् ब्वतिकयाः पत्रकारिता क्षेत्रय् ज्या यानां वनेत उत्साहित जुयागु धयादिसें थुगु तालिमं थःम्हेसिनं पत्रकारिता क्षेत्रया आपालं खँ सयेके/सीकेखँगु धयादिल ।

तालिम ज्वःछि मू प्रशिक्षक मानन्धरं समाचारया परिभाषानिसें कयाः नागरिक पत्रकारिता, आचार संहिता, फिचर लेख च्वयेगु आदि विषय स्यनादीगु खःसा मनोजरत्न शाहीं फोटो पत्रकारिताया विषयस स्यनादीगु खः । अथेहे प्रमिला मानन्धरं मस्तयगु च्यूताः (बाल सरोकार) या विषयस नं पत्रकारिता यायेमाःगु व उकिया बारे ध्वाथुइकादीगु खः । जीवन म्वायेगुया विषयस शोभा महर्जन वज्राचार्यं अभिमुखीकरण यानादीगु खःसा केपि ढुङ्गानां अनलाईन समाचारया विषय व वेद रानामगरं शुद्धाशुद्धिया विषयस तालिम बियादीगु खः ।
तालिमया झ्वलय् विश्व सम्पदा धलखय् दुथ्याःगु स्वयम्भुइ हे वनां स्थलगत कक्षा नं जूगु खः ।

जझ्वःया सभापतिलिसें ग्वसाःखलःया अध्यक्ष अर्विन्द्रमान सिंहं पत्रकार जुइ न्ह्यांपिंत आधारभूत पत्रकारिताया विषयस ज्ञान जक वियागु थुकी नं पत्रकारिता ख्यलय् ज्या यायेत अःपुइगु व माल धाःसा माःकथंया मेमेगु तालिमया नं ग्वसाः ग्वयेगु जानकारी बियादिल ।

तालिम क्वचायेके ज्याभ्वलय् प्रशिक्षार्थीपिनिपाखें ग्वसाःखलःया सकल जःपिंत खादा क्वखायेका हनादीगु खःसा सुभाय् पौ देछायादीगु खः । अथेहे मू प्रशिक्षक मानन्धरयात नं सुभाय् पौ लःल्हानादीगु खः ।

वंगु जेठ १५ गते येँ महानगरपालिका वडा नं. १५ या अध्यक्ष इश्वरमान डंगोल उलेज्या यानादीगु थुगु तालिम येँया डल्लुइ च्वंगु जगतसुन्दर ब्वनेकुथिइ न्ह्यानाच्वंगु खःसा तालिमय् ५७ म्हेसिनं ब्वतिकयाच्वंगु खः।