स्वयम्भुइ स्थलगत पत्रकारिता कक्षा
नेवाः पत्रकार राष्ट्रिय दबू येँ कचाया ग्वसालय् न्ह्यानाच्वंगु १५ न्हुया आधारभूत पत्रकारिता तालिमया झ्वलय् स्वयम्भुइ स्थलगत कक्षा जूगु दु । फिचर लेखया लागि आइतवाः अन स्थलगत भ्रमण याकाः कक्षा काःगु खः ।
छुं नं घटनाया समाचार दयेकेगु फिचर च्वयेगु, नागरिक पत्रकारिता, आचार संहिता, शुद्धा शुद्धि आदि विषयया नापनापं फोटो पत्रकारिताया विषयस तालिम जुयाच्वंगु खः । थ्वहे झ्वलय् गुकथं एंगल ल्ययेगु व लेख तयार यायेगु नापं किपा कायेबलय् नं गुकथं बांलक किपा कायेगु धइगु बारे स्वयम्भुइ प्रयोगात्मक रुपं स्यनेगु ज्या जूगु खः । थुगु स्यनेज्याझ्वःया मू प्रशिक्षक नेपालभाषा टाईम्सया सम्पादक सुरेश किरण मानन्धरं तालिम बिया च्वनादीगु खःसा फोटो पत्रकारिताया बारे गोरखापत्रया मनोज रत्न शाहीं तालिम बिया च्वनादीगु खः ।
वंगु आइतवाः जगत सुन्दर ब्वनेकुथिइ येँ मनपाया वडा नं. १५ य् हाकनं त्याकादीम्ह वडाअध्यक्ष ईश्वरमान डंगोलं उलेज्या यानादीगु थुगु तालिमय् नेवाः व गैर नेवाःत याना थ्यंमथ्यं ५५ म्हेसिनं ब्वतिकयाच्वंगु दु । तालिम थ्वहे जेठया ३० गते क्वचाइगु जानकारी ब्यूगु दु ।
News Location:
