आशाकाजी थकु, अन्नपूर्णेश्वरी श्रेष्ठ व अशोक बस्नेतयात तेजकृष्ण नानिमाया सिरपा
“संस्कृति सम्बद्र्धनया नितिं युवा” धइगु नारा बिसें न्ह्यानाच्वंगु दबुलि नेपाल संस्थां थौं शनिवाः छगू ज्याझ्वःया दथुइ नेपालभाषाया ख्यालःविधायात च्वन्ह्याकेगु ज्याय् मद्दिक्क ज्या यानाच्वनादीपिं आशाकाजी थकु, अन्नपूर्णेश्वरी श्रेष्ठ व अशोक बस्नेतयात “तेजकृष्ण नानिमाया लुमन्ति सिरपा” देछाःगु दु । दबुलि नेपालया नायः ई। सन्तोष प्रजापतिया सभापतित्वलय् थिमिया थिमि ब्याँङ्क्वेटय् जूगु ज्याझ्वलय् मेपिं थीथी ब्यक्तिपिंत नं हनेज्या याःगु खःसा मुहालि बाजाया वृत्तचित्र नं सार्वजनिक याःगु खः ।
नेपालभाषाया मौलिक विधा ख्यालःयात थौं तकनं न्ह्याका उल्लेखनीय योगदान याःगु धासें ज्याझ्वःया मूपाहां वरिष्ठ संस्कृतिविद् हरिराम जोशीजुं ख्यालःमिपिंत दोसल्लां न्ययेका दसि पौ लःल्हानादीगु खःसा दबुलि संस्थाया संस्थापक डा. सुभाषराम प्रजापतिं दां लःल्हानादीगु खः ।
ज्याझ्वलय् थिमि नगरपालिकाय् दुगु सम्पदा त ल्यंकेगु ज्याय् उल्लेख्य योगदान यानादीगु धासें मध्यपुर थिमि नगरपालिकाया प्रमुख मदन सुन्दर श्रेष्ठयात नं झिंनिकु हाकःगु फेत्तां चिकाः हनापौ देछासें हनादीगु खः । नगर प्रमुख श्रेष्ठयात दबुलिया सकल जःपिंसं नं खादां क्वखायेकाः हनादीगु खः ।
अथेहे ज्याझ्वलय् नकतिनि क्वचाःगु नेवाःतय्गु राष्ट्रिय् संगठन नेवाः देय् दबूया न्हय्क्वःगु तःमुँज्यां नायः ल्ययादीम्ह पवित्र वज्रााचार्ययात नं हनापौ देछासें हना दीगु खः ।
ज्याझ्वलय् दबुलि नेपालया पिथना “दबुलि” नांया बुलेटिनया नं चिखिफ्यने ज्या जूगु खः । मूपाहाँ जोशीलिसें संगीत नाट्य प्रतिष्ठानया अध्यक्ष प्राज्ञ रायन, मध्यपुर थिमि नगरपालिकाया प्रमुख श्रेष्ठ व ज्याझ्वःया अध्यक्ष प्रजापतिं मंकाःकथं उगु बुलेटिनया चिखि फ्यनादीगु खः ।
ज्याझ्वलय् नेपाल संगीत नाट्य प्रज्ञा प्रतिष्ठान व मध्यपुर थिमि नगरपालिकाया ग्वहालिइ दबुलि नेपालं दयेकूगु लोपोन्मुख बाजा मुहालि बाजायाबारे दुग्यंक अध्ययन यानातःगु वृत्तचित्र सार्वजनिक यानाः न्ह्यब्वःगु खः । दबुलि नेपालया छ्याञ्जे सुरेन्द्र प्रजापतिं लसकुस यानादीगु ज्याझ्वलय् संस्थाया संरक्षक गणेशराम लाछि सुभाय् बियादीगु खःसा ज्याझ्वः शरद कसाःजुं न्ह्याकादीगु खः ।
