किपुलिइ हाथु द्यः पलिस्था

किपू नगरपालिका वडा नं. १० चीथुलिइ हाथु द्यः पलिस्था याःगु दु । स्थानीय सन स्टर क्लवया कुतलय् थुगु हाथु द्यः थौं सिलाचःर्हे (मंगलवाः) खुन्हु पलिस्था याःगु खः । थुगु हाथु द्यः न्हापा मल्लकालय् न्ह्यानाच्वंगु खःसा शाहकालय् थुगु तजिलजि किपुलिइ न्हनावंगु खः ।

आः वया सन स्टार क्लवया कुतलय् वंगु येयाः पुन्हि खुन्हु हे पलिस्था यायेगु कुतः जूगु खःसां द्यः कीगु सिमथःगु हुनिं थौं सिलाचःर्हे खुन्हु जात्रा याना पलिस्था याःगु खः । द्यः दयेकूगु थाय् बुंगय् सुथय हे बाजं सहित वंगु खःस अन पुजा याना गाडिइ तया किपूया ताहाँल्चाय् तक हःगु खः । ताहाँल्चांनिसें काहाँबाजा, नायखिं बाजा, धिमे बाजा, धाः बाजा व बाँसुरी बाजा सहित साँस्कृतिक र्यालीयाना चीथु फल्चाय् हःगु खः ।

ताहाँल्चाय् थ्यंबलय् किपू नगरपालिकाया प्रमुख रमेश महर्जन, उप–प्रमुख सरस्वती खड्का, ९ नं. वडा अध्यक्ष गंगाराम महर्जनं लँ स्वःवःगु खःसा वडा नं. १० या अध्यक्ष अमन महर्जन बुंगंनिसें हे ब्वति कयादीगु खः ।

चीथुलिइ पलिस्था याःगु थुगु हाथु द्यःया उलेज्या ज्याझ्वः किपू नगरपालिकाया प्रमुख रमेश महर्जन व उप– प्रमुख सरस्वती खड्कां त्वाःदेवाय् मत च्याका उलेज्या यानादीगु खः । मू पाहाँ ख्यालि जुजु मदनकृष्ण श्रेष्ठं हाथु द्यःयात रिवन चाना उलेज्या यानादीगु खः ।

ज्याझ्वलय् द्यः पलिस्था यायेत आर्थिक ग्वहालि यानादीपिं सकसितं मू पाहाँ श्रेष्ठं सुभाय् पौ लःल्हानादीगु खःसा नगर प्रमुख महर्जन व उप–प्रमुख खड्कां खादा क्वखायेका हनादीगु खः ।

सन स्टार क्लवया नायः हिराकाजी महर्जनया सभापतित्वय् जूगु ज्याझ्वः भरत महर्जनं न्ह्याकादीगु खः ।

News Location: