स्थानीय पाठ्यक्रम ब्वंकीपिंत ब्यूगु तालिम क्वचाल
किपू नगरपालिकां स्थानीय पाठ्यक्रम ब्वंकेगु लागु यासेंलि शिक्षक समेत व्यवस्था यानां फुक्क स्कुलय् नेपालभाषा ब्वंकेगु शुरु याये धुंकूगु इलय् दक्वं शिक्षकपिंत नेपालभाषा ब्वंकेत सहज (ग्वहालि) जुइमा धकाः कीर्ति रिसर्च सेन्टरं नेपालभाषा ब्वंकेगु तालिम शुरु याःगु खः । किपू नगरपालिकाया ग्वहालिं वंगु निलाः न्ह्यः शुरुयाःगु उगु तालिम मंगलवाः क्वचायेकूगु खः ।
मंगल मा.वि.इ जूगु तालिम क्वचायेके ज्याझ्वलय् मू पाहाँ किपू नगरपालिकाया प्रमुख रमेश महर्जनं ज्याझ्वःया उलेज्या यानादीगु खःसा नगर प्रमुख महर्जन, उप–प्रमुख सरस्वती खड्कां तालिमय् ब्वतिकयादीपिं सकल शिक्षकपिंत दसि–पौ लःल्हानादीगु खः ।
ज्याझ्वलय् न्ववानादिसें मूपाहाँ नगर प्रमुख महर्जनं थःपिनिगु न्यादँया कार्यकाल क्वचायेत्यंगु इलय् थःपिंसं यानागु ज्यायात क्वथीक दुवाला स्वयाबलय् दक्कले लुधंगु व बांलाःगु ज्या यानागु धयागु नगरया स्कुलय् स्थानीय पाठ्यक्रम (नेपालभाषा) लागु यानागु कनादिल । नेपाःया संविधानं ब्यूगु अधिकारयात खःथाय् माःबलय् माःकथं छ्यलागु कनादिसें नगर प्रमुख महर्जनं स्कुलय् जक नेपालभाषा ब्वंकेगु मजूसे झीगु नेवाःतय्गु तजिलजि, पहिचान ल्यंकेगु व झीगु म्हसीका ब्वयेगुलिसें झीगु अधिकार झीसं हे छ्यलागु ध्वाथुइका दिल ।
ज्याझ्वलय् उप–प्रमुख सरस्वती खड्कां नेपाःया संघियताया न्हापांगु जनप्रतिनिधि जूगुलिं संघियतायात व्यवहारय् छ्यलेकथं स्थानीय पाठ्यक्रम दयेकेत ताःलायेधुंकूगु व आः याकनं हे पाठ्यसफू नं तयार जुइगु न्ह्यथनादिल ।
ज्याझ्वलय् ग्वसाः खलः कीर्ति रिसर्च सेन्टरया न्हापांगु सफू कीर्ति रिसर्च जर्नल ल्याः १ या नं चिखिफ्यने (विमोचन) याःगु खः । मूपाहाँ नगर प्रमुख महर्जन, उप–प्रमुख खड्कालिसें किपू नगरपालिका शिक्षा समितिया जुजुभाइ महर्जन व किपू नगरपालिका सामाजिक विकास शाखा प्रमुख अनुज प्रधानं मंकाःकथं थुगु सफूया चिखिफ्यने (विमोचन) यानादीगु खः ।
चिखिफ्यने (विमोचन) जूगु सफू व उकी दुथ्याःगु च्वसूयाबारे ग्वसाः खलःया न्वकू कर्ण महर्जनं समिक्षा यानादीगु खः । ग्वसाः खलःया अध्यक्ष डा.वज्रमुनि वज्राचार्यया कार्यकारी सम्पादनय् पिदंगु थुगु सफुतिइ थीथी विषयलय् दुग्यंक वालाः (रिसर्च याना) तःगु ज्याझ्वलय् जानकारी ब्यूगु खःसा सफुतिइ च्वसूबियादीपिं च्वमिपिंत सफू छगू छगू नं लःल्हानाः ब्यूगु खः ।
तालिमय् ब्वतिकयादीपिनिपाखें सिलकुमारी महर्जनं तालिमया बारे थःगु अनुभव कनादीगु खःसा प्रशिक्षार्थिपिंनिपाखें तालिम बियादीपिं प्रशिक्षकपिं जीवन महर्जन, जुजुभाइ महर्जन व डा.वज्रमुनि वज्राचार्ययात मतिनाया चिं लःल्हानादीगु खः ।
ग्वसाःखलःया अध्यक्ष डा. वज्रमुनि वज्राचार्यया सभापतित्वय जूगु थुगु ज्याझ्वलय् सभापति डा. वज्राचार्यं किपू नगरपालिकां अतिकं महत्त्वपूर्णगु ज्या स्थानीय पाठ्यक्रमय् नेपालभाषा विषय लागु याःगु च्वछायेबहःजू धयादिसें नगरपालिकायात सुभाय् बियादिलसा लिपा लिपा नं थुगु कीर्ति रिसर्च सेन्टरपाखें माःगु ग्वहालि यायेगु बचं बियादिल ।
ग्वसाःखलःया दुजः प्रयागमान प्रधानं लसकुस यानादीगु ज्याझ्वः भरत महर्जनं न्ह्याकादीगु खः ।
News Location:
