किपुलिइ नेवाः वसः सुयेगु तालिम क्वचाल

परम्परागत नेवाः वसः पुनेगु लोप जुया वनीगु ग्याचिकु ब्वलनाच्वंगु इलय् किपू नगरपालिकां थुकीयात विशेष ध्यानबिया ज्या यानाच्वंगु दु । नेवाः वसः नेवाःतय्गु पहिचान लिसलिसें राष्ट्रया हे म्हसीका दुगु थुगु वसःयात ल्यंका तयेगु जक मखुसें थुकीयात लजगाः कथं हे ज्या यायेजीक किपू नगरपालिकां थीथी ज्याझ्वः यानाच्वंगु खः । थ्वहे झ्वलय् किपू नगरपालिका वडा नं. १० य् नेवाः वसः सुयेगु तालिम हे न्ह्याकाच्वंगु खःसा थौं बुधवाः थुगु तालिमया समापन ज्याझ्वः जूगु दु ।

स्वलायंकं जूगु थुगु नेवाः वसः सुयेगु तालिमया क्वचायेके (समापन) ज्याझ्वःया उलेज्या किपू नगरपालिकाया प्रमुख रमेश महर्जनं यानादीगु खः । किपूमिपिं छुं नं भिंगु ज्या यायेबलय् क्वय्ना गनेद्यः पुज्यायेगुु चलनयात निरन्तरता बीकथं क्वय्ना गनेद्यःयाथाय् वनां लिक्कच्वंगु वडा नंं ६ ज्याकूया हलय् थुगु ज्याझ्वः जूगु खः । ज्याझ्वलय् न्ववानादिसें मू पाहाँ नगर प्रमुख महर्जनं थुगु नेवाः वसः सुयेगु सयेकेगु तालिमया समापन जूगु खःसां धात्थेंया ज्या यायेगु शुरु जूगु कनादिल । स्वाला जक सयेकाः पूवनी मखुगु धयादिसें नगर प्रमुख महर्जनं बांलाक सयेकेत अझं निपाः प्यपाः लं सुयेबलय् स्यनेफुगु व अथे स्यन धकाः नुगः मछिंके मज्यूगु धयादिसें मिहिनेत याना वं वं वनकि अथें हे बांलाक सयेके फइगु कनादिल । थुगु सयेकागु ज्यायात थःगु ल्हाःज्या कथं हे याना झीगु पहिचान, झीगु म्हसीका नं ल्यंनीगु व आम्दानी नं जुइगु जूगुलिं थुकीयात निरन्तरता बिया ज्या यानादीत सकल ब्वतिकयादीपिंत इनाप यानादिल
ज्याझ्वलय् उप प्रमुख सरस्वती खड्कां विशेषयानां परिवारय् मिसापिं उद्यमशील जुलधाःसा परिवार बांलाइगु धयादिसें सकल नगरबासीयात ल्हाःतय् सीप तयाबीगु नगरपालिकाया दायित्व हे नं जूगुलिं नगरपालिकां थुगु ज्या मद्दिक्क याना च्वनागु न्ह्यथनादिल । उप–प्रमुख खड्कां नेपाल सरकारं सन् २०३० तकया दुने दिगो विकासया लक्ष्य पूवकेगु धकाः अन्तर्राष्ट्रिय प्रतिवद्धता यानातःगु खँय् वाःचायेका सकलसित उगु नेपाल सरकारया प्रतिवद्धतायात थःथःगु थासं ग्वहालि यायेमाःगु खँय् बः बियादिल । सकलसिनं थःके दुगु सीपयात व्यवहारय् छ्यलाः आम्दानी यायेफत धाःसा सुंनं द्यांमलाइगु व वहे नं छगू कथं दीगो विकासया लक्ष्य पूवनीगु धयादिसें उप–प्रमुख खड्कां सकलसिनं सयेकागु ज्या सीपायात छ्यला ज्या यानादीत इनाप यानादिल ।

ज्याझ्वलय् वडा नं. ६ या अध्यक्ष न्हुच्छेबहादुर महर्जननं थःगु नुगःखँ तयादीगु खःसा प्रशिक्षार्थिपिनिपाखें हिसिला महर्जनं थःगु नुगः खँ तयादीगु खः । ज्याझ्वलय् गुम्ह प्रशिक्षार्थिपिंत नगर प्रमुख महर्जन, उप–प्रमुख खड्का, वडा नं. १ या अध्यक्ष हर्ष महर्जन, वडा नं. २ या अध्यक्ष रमेशमान डंगोल, वडा नं. ३ या अध्यक्ष राजेन्द्र महर्जन, वडा नं. ४ या अध्यक्ष राजेन्द्र बानियाँ, वडा नं. ९ या अध्यक्ष गंगाराम महर्जनपिंसं दसि पौ लःल्हानादीगु खः ।

ज्याझ्वलय् प्रशिक्षण बियादीम्ह नारायण कपालीयात प्रशिक्षार्थिपिनिपाखें मतिनाया चिं देछायादीगु खः । वडा नं. १० या अध्यक्ष अमन महर्जनया सभापतित्वय् जूगु ज्याभ्वः वडा नं. १० या सदस्य चिनीकाजी श्रेष्ठं लसकुस यानादीगु खःसा वडा नं. १० या सदस्य संगीता उप्रेती श्रेष्ठं ज्याझ्वः न्ह्याकादीगु खः ।

News Location: