किपुलिइ दरवार पहः वयेक वडा छेँ दनीगु

किपू नगरपलिका वडा नं. १ या ज्याकू छेँ दयेकेया निति थौं बिहीवाः जग साइत (शिलान्यास) याःगु दु । येँ जिल्ला विकास समन्वयया प्रमुख शिव सुन्दर बैद्यया मू पाहाँसुइ न्ह्याःगु उगु शिलान्यास ज्याझ्वः येँ जिल्ला विकास समन्वय समितिया उप–प्रमुख सरिता दाहाल, किपू नगरपालिकाया प्रमुख रमेश महर्जन, उप–प्रमुख सरस्वती खड्कालिसें वडा नं. १ या अध्यक्ष हर्ष महर्जनं मंकाःकथं यानादीगु खः ।

छुं न्हि न्ह्यः हे उगु छेँ दयेके धकाः टेण्डर तकं याये धुंकूगु खःसाः छथ्व अभियन्तातय्सं अन न्हापा तलेजु दुगुलिं तलेजु नं दयेकेमाः धकाः सः थ्वयेकाच्वंगु खः । उकीया हे लिच्वः कथं नगरपालिकां प्रयागमान प्रधानया संयोजकत्वय् छगू अध्ययन पुचः दयेकूगु खः । उगु अध्ययन पुचलं येँ, यल, तोखा, थिमि, ख्वपलगायत थासय् अध्ययन याना प्रतिवेदन लःल्हाःगु खः । उगु हे प्रतिवेदनया लिधंसाय् आः उगु थासय् तलेजु सहित पुलांगु दरबार पहःवयेक वडा भवन दयेकीगु जूगु खः ।

शिलान्यास धुंकाः जूगु ज्याझ्वलय् मूपाहाँ वैद्यं किपूया महत्वंजाःगु ऐतिहासिक धरोहर लाय्कू दरबार दयेकेमाःगु व किपू नगरपालिकाया जक बजेटं मगाःगु जूगुलिं येँ जिल्ला समन्वय समितिं ग्वहालि यानादीत इनाप याःकथं समितिं निर्णय याना थौं शिलान्यास यायेदयाः थः लयेताःगु खँ धयादिल । थुगु छेँ याकनं सिधयेमा धकाः कामना यानादिसें जिल्ला समन्वय समितिं येँ जिल्लाय् दुगु आपालं पालिकाया भवनत दयेकाच्वनागुलिं किपू नगरपालिका दक्कले न्ह्यःने लाःगु नं न्ह्यथनादिसें किपू नगरपालिकाया मेमेगु वडा भवन नं दयेकेगु खँ जुयाच्वंगु जानकारी बियादिल ।

ज्याझ्वलय् किपू नगरपालिकाया प्रमुख रमेश महर्जनं थुगु वडा छेँ लाय्कु दरवार परिसय् लाःगु जूगुलिं मल्लकालिन दरबार गन गन दुगु खः अन तलेजु नं दइगु जूगुलिं उकीयात विस्तृत अध्ययन याना थुगु नक्सा तयार जूगु न्ह्यथनादिल । नगर प्रमुख महर्जनं थुगु तलेजु सहितया वडा छेँ धस्वायेधुंकाः किपुलिइ पर्यटन क्षेत्रय् बांलाःगु ह्यूपा वइगु धयादिल । थुकीयालागि दक्वसिनं माःगु सल्लाह बियादीत नं इनाप यानादिसें थुगु भवन दयेकेयालागि येँ जिल्ला विकास समन्वय समितिं ग्वहालि यानादीगुलिं समितियात नगर प्रमुख महर्जनं विशेष सुभाय् बियादिल । थुकथं हे किपू नगरपालिकाया वडा नंं २, ३, ४ व ७ नं. या नं वडा छेँ दयेकेगु खँ जुयाच्वंगुलिं उगु वडा छेँ दयेकेत गुहालिया नितिं नं नगर प्रमुख महर्जनं येँ जिल्ला समन्वय समितियात इनाप यानादिल ।

वडा नं. १ या अध्यक्ष हर्ष महर्जनं हे न्ह्याकादीगु ज्याझ्वलय् वडा नंं. २ या अध्यक्ष रमेशमान डंगोल, वडा नं. ३ या अध्यक्ष राजेन्द्र महर्जन व वडा नं. ६ या अध्यक्ष न्हुच्छेबहादुर महर्जनयालिसें जनप्रतिनिधि व सर्वसाधारणया नं ब्वति दुगु खः ।