किपू नगरयात पूवंक मास्क क्षेत्र दयेकेगु अभियान
किपू नगरपालिकायात पूर्ण मास्क क्षेत्र दयेकेनु, किपुलिइ मास्क बैंक पलिस्था यायेनु, कोरोनां थःनं बचे जुइनु व मेपिंत नं बचे यायेनु लिसें छिगु मास्क ग्व? धइगु मू नारा ज्वना रोटरी क्लब अफ कीर्तिपुर, ईनर ह्वील क्लब अफ कीर्तिपुर, लायन्स क्लब अफ कीर्तिपुरया मंकाः ग्वसालय् किपुलिइ मास्क अभियान न्ह्याकूगु दु । किपू नगरपालिका वडा नं. १, बाघ भैरबलागाय् मास्क तयेमाः धकाः जनचेतना यायेगु व मतःपिंत मास्क इनेगु ज्याझ्वः याःगु खः ।
वंगु गुंपुन्हिखुन्हु बाहाःचाःहिलेगु न्हिसं थुगु ज्याझ्वः याःगु खः ।ज्याझ्वलय् रोटरी क्लब अफ कीर्तिपुरया नकिं राज्यलक्ष्मी बैदारं झीगु तजिलजि व सम्पदा ल्यंकाः तयेगु झी सकसिगुं दायित्व जूगु धयादिसें आःया थुगु कोरोना महामारीया इलय् थःनं बचे जुया मेपिंत नं बचेयायेगु झी सकसिगुं कर्तब्य खः उकिं झी सकलें सचेत जुयाःमेपिंत नं सचेत यायेगु जरुरी जूगु धयादिल ।
रोटरियन रविन्द्र बहादुर प्रधानया कजिसुइ छिगु मास्क ग्व? धइगु अभियानयात मद्दिक्क न्ह्याका मास्क बैंक हे पलिस्था यायेगु योजनालिसें रोटरी क्लबया नकिं बैदार, ईनर ह्वील क्लब अफ कीर्तिपुरया नकिं सुशीला मानन्धर, रोटर्याक कीर्तिपुरया नकिं रुबी शाह, लायन्स क्लब काठमाडौं कीर्तिपुरया नायः शिव कुमार श्रेष्ठ, लियो क्लब कीर्तिपुरलगायत क्लबया दुजःपिंसं थःथःगु नुगःखँ तयादीगु खः । थौंकन्हय्या विषम परिस्थितिइ मास्क इनेगु व बैंक पलिस्था यायेगु बांलाःगु ज्या जुइगु ज्याझ्वलय् धयादीगु दु । रोटरियन श्याम शाहया कजिसुइ जूगु ज्याझ्वःयात सुरेन्द्र बज्राचार्यं सहजीकरण यानादीगु खः ।
News Location:
