मिस नेवाः जिगु लुमन्ति व अनुभव

एञ्जिला अवाले

जि मचाबलय् beauty pageant ला स्वयेगु याना तर जिके यकदम हे रुची धाःसा मदु। फेसन शेन्स तक हे पटक्क मदुम्ह जि थें न्याम्हेस्यां ब्वति कायेगु ला म्हगसये नं हे मदु। तर छन्हु लिक्क च्वँम्ह काकीं "Miss Newa जुई त्यंगु दु छ बाँला ब्वति का ले" धयादिल। जि ला फुरङ्ग, बाँलाला जि? तुरन्त वना न्हायेकं स्वो वना। बा माँ पिन्त न्येना। जिमि तता पिंत नं न्येना। बिशेष याना मलिका ततां ला यक्व ग्वाहालि व हपाः बियादिल। तर जि थें न्याम्ह ल्ह्वम्ह छानये हे मजुल धाःसा छुयायेगु धैगु ग्या चिकु चाहिं दया च्वन। मिले जूपिं पासा पिंत सल्लाह कया, मलिका तता थाये हानं वना। ग्याये म्वा जि दु धयादिल, जि धुक्क। दक्वस्याँ प्रोत्साहन बिसें नाँ च्वका। जि ला सेलेक्ट जुल।

आ जिगु ब्यस्त ई शुरु जुल। शुरुई तसकं नर्भस जि, था नं थाकुल। तर न्हु न्हुगु खँ सयेके न्ह्या जि, तसकँ न्ह्येयपुल। ब्युटि पायजेन्टय् ब्यवस्था याना तपिं गुरुपिंसँ दाई, तता थे अझ धाये अभिवाकं थें माया याना स्यनेकने याना दिल। याः लिसे न्ह्यागु नं अपुईगु जुया च्वोन। जिगु आत्मबिश्वास बल्लाना वल। गबले तजाःगु लाकां न्ह्याये मनंम्हेस्याँ तजाःगु लाकां न्ह्याना अपुक्क हे जुईफत। फेशन शेन्स दयावल। तिसा वसःगयेयानां फिईगु सिया वल। न्हियान्हिथं सौन्दर्यया थिथि ज्ञान दयावल। शुरुईला क्यामेरा खन कि हे जि नर्भस। लिपा क्यामेरा फेस अप्पुक हे यायेफत, क्यामेरा न्ह्येने नवायेगु, क्याट वाक, सः सां मससां प्याखँ ल्हुईगु व चिनाखँ वाचन यायेगु तकँ यायेफत। Practice make you perfect धाःथें अभ्यास याःसा न्ह्यागुं अपुईगु जुया च्वन। फोटो शेसन हे निकः स्वकः याना न्ह्येईपुसे च्वन।

ट्रेनिङ्ग शेसनये यक्व पासिपिं नाप हेलमेल जुईगु अवसर दत। छकें प्रतिस्पर्धा, छकें पासापिं नाप परस्पर सिके सयेकेगु व मित्रताया अवसर। तसकं न्ह्येईपुसे च्वन। मेमेगु ब्युटि कन्टेष्टये भाग काये धुंकुपिं व थिथि उपाधि त्याके धुंकुपिं नं नापलात।

सयेकेगु सिकेगु यक्व अवशर दत। खासयाना जि नेवाःया म्ह्यायमचा, नेवाः संस्कृति, तजिलजि व थिथि खँ सयेके दया तसकँ लयेताः।
जिगु नेपाल भाषा न्हापा स्वया बाँलात। नेपाल लिपि सयेका, यो मर्हि दयेके सयेका, थिथि नेवाः नसा दयेके सयेका। अहो नेवा नसाला वैज्ञानिक रुपं नं पौष्टिक व बाँलागु जुया च्वन। नेवाः तिसा वसः व नखः चखः बारे यक्व खँ सिल। प्रतियोगिताया निम्तिं थम्ह नं self-study नं याना। नेपाल संबत व थिथि नेवा लाया नां सिल। थ्व हे झ्वलये महाँकाः द्योयाथाय लाखबत्ती च्याकेगु, ते बहालये नेवाः भ्वयलये प्रत्यक्ष सहभागि जुईगु अवसर नं दत।

ट्रेनिङ्ग झ्वलये हे थिथि अतिथि पिनिगु लेक्चर पाखें न॔ यक्व खँ सिल। वयेकनिगु उपललब्धी, जीवनये यायेमाःगु समस्या व याना दिउगु समाथान नं प्रेरणादायी जुल।

समस्तिगत रुपं धायेगु खः सा जिं छुं बिशेष उपाधी त्याके मफुसां जि शन्तुष्ट हे दु। छायेधाःसा जिगु ब्यक्तित्व बिकास जूगु दु, आत्म बिश्वास बढे जुल, सामुहिक रुपं नवायेगु व क्यामेरा फेस यायेत आ दः सामान्य जुई धुंकल। दक्वलये तःधंगु मिसा छु खः, मिसा जातिया समाजय योगदान व गर्व छु खः धैगु सिउगु दु। जिगु थ्व बढे जुगु क्षमता व हौसलां झीगु भाय, समाज व नारी चेतना थकायेगु व नेपाः माँया सेवा यायेगु जिगु लक्षयात अःपुगु दु।

(मय्​जु अवाले मिस नेवाः ११४१ य् ब्वति कया मिस डिसिप्लिन टाइटल त्याकादीम्ह खः । )

More Stories Like this