कृषा महर्जन जुल मिस नेवाः ११४१
थौं जूगु मिस नेवाःया ग्राय्ण्ड फिनालेय् कृषा महर्जनयात मिस नेवाः ११४१ ल्यःगु दु । मिस नेवाःया मू टाइटललिसें वय्कलं बेस्ट नेपालभाषा टाइटल नं त्याकादीगु खः । डल्लु, येँय् च्वंम्ह नीनिदँया महर्जनं थ्व टाइटल लिसे छगू लख दांया नगद सिरपा नं त्याकादीगु दु ।
ज्याझ्वलय् फर्ष्ट रनर अप प्रिया तण्डुकार व सेकेण्ड रनर अप क्रिस्टिना महर्जनं त्याकादीगु खः । थ्वलिसें तण्डुकारं मिस पब्लिक च्वाइस व महर्जनं मिस चार्मिंग टाइटल त्याकादीगु खः । अथे हे मिस फ्रेण्डशीप, मिस फोटोजेनिक व मिस ट्यालेन्ट मनिका खड्गी, मिस बेस्ट स्माइल सौर्य शाही, मिस बेस्ट स्क्रिन व सोसल वेरफेयर रोहिना महर्जन, मिस बेस्ट हेयर व मिस पर्सनालिटी लेनिका डंगोल, मिस डिसिप्लिन एञ्जिला अवाले, मिस बेस्ट ड्रेस मनिषा महर्जन जुयादीगु दु ।
कासाय् न्हापालाक म्हसिका बीगु झ्वलय् हे निर्णायकपिंसं न्ह्यसः न्यंगु खःसा उकीया लिच्वःकथं न्हयम्हेसित ल्यःगु खः । लिपांगु चरणय् न्हयम्हेसित म्हय् लाइगु घाः व नुगलय् लाइगु घाःया बारे लिखित न्ह्यसः न्यंगु खः । न्यागू मिनेटय् लिसः च्वये सिधयेके माःगु खः । उकी च्वयाब्यगु लिसःया हे आधारय् मयजु कृषा महर्जनं मिस नेवाः ११४१ जुइत ताःलाःगु खः ।
निर्णायक मण्डलय् नेपाल टेलिकमया व्यापारिक प्रमुख भानुराज श्रेष्ठ, नेपाल क्योकुसिन कराँते एशोसियसनया अध्यक्ष अशोककुमार श्रेष्ठ, नेपाल संवत् ११३४ या मिस नेवाः त्याकादीम्ह एलिशा बज्राचार्य, कन्सर्न नेपालया निर्देशक डा. विजय सैंजु, विशेष ओलम्पिक नेपालया अध्यक्ष डा. शिक्षिता श्रेष्ठ व नेपाल लिपि गुथिया न्वकू अनिल स्थापितपिं च्वनादीगु खः ।
ज्याझ्वःयात मू पाहाँ सूचना व संस्कृति मन्त्री पार्वत गुरुङ्गं त्वाः देवाय् मत च्याका उलेज्या यानादीगु खःसा मिस नेवाः ११४१ या अफिसियल सामाजिक सञ्जाल “नेवाः प्राइडं” तप्यंक प्रसारया याःगु खः । प्रसारित उगु बिजंकासा नेवाः प्राइडया फेसबुक पेजय् स्वयादीफइ ।
नेपाल टेलिकम मू प्रायोजक जुयादीगु व नेप्लिज फेसन होमया ग्वसालय् जूगु थुगु कासा झिंन्याक्वःखुसी खः । ज्याझ्वःयात मिस नेवाः सन् २०११य् मिस नेवाः जुइत ताःलाःम्ह मयजु सुनिता डंगोल व रोजेन शाक्यं न्ह्याकादीगु खः ।
