कन्हय माघ २२ गते आम हडताल जुइगु

असंवैधानिक संसद् विघटनया विरोधय् नेपाल कम्यूनिष्ट पार्टी (नेकपा) माधव–प्रचण्ड समूहं मद्दिक यानाच्वंगु सतक आन्दोलनया झ्वलय् बुधवाः किपुलिइ मशाल जुलुस पिकाःगु दु ।

नेकपा किपू नगर समितिया ग्वसालय् जूगु मशाल जुलुस किपूया तसकं व्यस्त जुयाच्वनीगु सतक अमल्सि (नयाँबजार) चाःह्यूगु खः । पार्टीया केन्द्रीय समितिया निर्णयकथं कन्हय् बिहिवाः माघ २२ गते आम हडतालया ज्याझ्वः तयातःगुलिं उगु ज्याझ्वःयात सुथांलाकेया लागिं मशाल जुलुस पिकायेमाःगु धाःगु दु । आम हडतालय् दक्वं शिक्षण संस्थात, बजाः, व्यवसाय, उद्योग, कलकारखाना व यातायातत पूवंक हे बन्द जुइगु धाःगु दु ।

जुलुसया झ्वलय् नेपाल प्रहरीं मशाल नियन्त्रणय् काःगु खः । जुलुस अमल्सि चाःहिलाः पांगा दुपातय् कोणसभाय् हिउगु खः । कोणसभाय् पार्टीया किपू नगर समितिया अध्यक्ष विकास महर्जनं संसद् पुनःस्थापना मजूतले, असंवैधानिक कदम मह्यूतले निरन्तर आन्दोलन यानाच्वनेगु न्ह्यथनादिल । पार्टीया किपू नगरसमितिया सचिव दिलबहादुर महर्जनं आन्दोलनय् ब्वतिकयादीपिं सकसितं सुभाय् बियादिसें ज्याझ्वः क्वचायेकादीगु खः ।

https://www.youtube.com/watch?v=DfZU4qZgT6k