दाफा तालिमया उलेज्याय् थीथी बाजं व म्ये गुरुपिंत हन

नेवाःतय्गु मौलिक बाजं दाफा संस्कृतियात ल्यंका तयेगु व न्हूपुस्तायात लःल्हायेमाःगु वाः चायेका शनिवाःनिसें दाफा थायेगु तालिम शुरु जूगु दु । स्वलातक न्ह्याइगु थुगु दाफा तालिमया किपू नगरपालिकाया प्रमुख रमेश महर्जनं छगू ज्याझ्वःया दथुइ त्वाःदेवाय् मत च्याका उलेज्या याना दीगु खः ।

किपू नगरपालिका वडा नं. १० तःतनी जूगु उगु ज्याझ्वलय् मूपाहां महर्जनं दाफा संस्कृति झी नेवाःतयेगु थःगु हे मौलिक संस्कृति जूगु न्ह्यथनादिसें थुकिया महत्वयात थुइगु थःपिं नगरपालिकाय् त्याना वनेधुंकाः न्हापां किपू नगरपालिका वडा नं. १ लाय्कुलिइ दाफा महोत्सव यानागु लुमंकादिल । दाफाय् हालीगु थीथी राग त अति हे महत्वंजाःगु न्ह्यथनादिसें मूपाहाँ प्रमुख महर्जनं वंगु दँनिसें हे दाफाया रागयात डिजिटलाइज यायेकथं स्टुडियोस रेकर्ड यायेगु ज्या न्ह्यानाच्वंगु कनादिल । सुं सुं गुरुपिंसं नाःसःद्यःयाथाय् न्ह्यःनेजक हालेमाःगु थुगु राग स्टुडियोस हालेमज्यू धकाः महाःगुलिं छुंछुं समस्या वयाच्वंगु व बुलुहुँ दक्व धयाथें राग त रेकर्डिङ्ग यायेक्वचायेकेगु ध्वाथुइका दिल । दाफा थायेगु परम्परायात न्हंना मवनेमा धकाः त्वाःत्वालय् दाफा थायेया नितिं नगरपालिकां आर्थिक ग्वहालि यानाच्वनागु नं न्ह्यथनादिल ।

किपू नगरपालिका वडा नं. १० तःननी दाफा खलःया ग्वसाः व सतोरी सेन्टर फर आर्टस्या ल्यू ग्वसालय् जूगु ज्याझ्वलय् किपूया थीथी त्वाःया दाफा, धिमे व म्येँ गुरुपिंत फेत्तां चिकाः सगं बियाः हनादीगु खः । लोकंह्वाःगु देवीप्याखँ लालहिरा बाखँयात संगीतया तालय् नेशन श्रेष्ठं न्ह्यब्वःगु खःसा बाजनय् इन्दिरा लाछिमस्यू व मन्नु शाही ग्वहालि यानादीगु खः । नेवाः बाजं धिमेलिसें आधुनिक बाजं गितारया फ्यूजन धुन नं न्ह्यब्वयादीगु खः ।

ज्याझ्वलय् तःननी दाफा खलःया अध्यक्ष दिलिपकुमार महर्जनं लसकुस यानादीगु खः । दाफा अनुसन्धानकर्ता त्रिरत्न मानन्धरं दाफा म्येँ सफूया बारे ध्वाथुइकादीगु खःसा किपू नगरपालिका वडा नं. १ या अध्यक्ष हर्ष महर्जन, वडा नं. २ या अध्यक्ष रमेशमान डंगोलं व फोकलोकया संस्थापक पुष्पा पलान्चोकं नं थःगु नुगः खँ तयादीगु खः ।

सन स्टार क्लव, तःननी टोल व भरियाँपुखू टोलया विशेष धिमय् प्याखं न्ह्यब्वःगु ज्याझ्वलय् सत्तोरी सेन्टर फर आर्टस् या सुभानी सिंहं ज्याझ्वः क्वचायेकादीगु खःसा मय्जु सुनिता डंगोलं ज्याझ्वः न्ह्याकादीगु खः ।