नेपालभाषा ब्वनामिपिन्सं गुरुपुन्हि हन
रत्न राज्य लक्ष्मी क्याम्पस व पद्म कन्या क्याम्पसय् स्नातक तगिमय् नेपालभाषा ब्वनाच्वंपिं ब्वनामिपिंसं येँया ओन्देय् च्वंगु नारायण परिवार क्लबय् तःजिक गुरु पुन्हि हंगु दु । ज्याझ्वलय् नेपालभाषा पुर्नस्थापना अभियानय् ग्वाहालि यानादीपिं रत्न राज्य लक्ष्मी क्याम्पसया सहायक क्याम्पस प्रमुख गोबिन्द प्रसाद आचार्य, श्रीमिला सुवाल, नानी हेरा प्रजापति, पद्यम कन्या क्याम्पसया प्रो. मदनसेन बज्र्राचार्यलिसें रत्नराज्य लक्ष्मी क्याम्पसय् न्हापांगु खुसिइ नेपालभाषा अनलाइन कक्षा न्ह्याकादीम्ह अनुपसिंह सुवाल व नवनियुक्ति क्याम्पस प्रमुख जीवनधर ज्ञवालीपिन्त सम्मान याःगु खः ।
ज्याझ्वलय् मनिषकुमार श्रेष्ठं नेपालभाषां राष्ट्रिय अस्तित्व ल्यंकाच्वंगु जुयाः महत्वपूर्ण भाषा जूगु न्ह्यथंसें लसकुस यानादिल । अथेहे शिक्षिका श्रीमिला सुवालं रत्नराज्य लक्ष्मी क्याम्पसय् वि.सं। २०७४ सालय् नेपालभाषा ब्वनामिपिसं शैक्षिक क्षेत्रय् न्हूगु ढंगं पलाः न्ह्याकादीगु खनाः उगु पलाःयात साथ बीत उगु इलय् क्याम्पस प्रशासनपाखें छुंहे व्यवस्था मयाःगु हुनिं नानीहेरा प्रजापति व थःम्हं निःशुल्क नेपालभाषा ब्वंकागु खँ लुमंका दिल । अथे हे थौंकन्हय् हानं विद्यार्थी पिनिगु कुतलं ५१, ५२ म्ह नेपालभाषा ब्वनामिपिं दये धुंकूगु सकल नेवाः जातिया नितिं छगू लसता जूगु खँ नं न्ह्यथनादिल ।
सहायक क्याम्पस प्रमुख गोविन्द प्रसाद आचार्यं भाषा दया च्वंतले जक झीपिं दया च्वनीगु उल्लेख यासें मातृभाषाया विशेष महत्व दुगु न्ह्यथंसे ब्वनामिपिनिगु भाषिक आन्दोलनय् साथ बियाच्वनेगु धापू प्वंकादील ।लकडाउनय् रत्न राज्य लक्ष्मी क्याम्पसया न्हापां अनलाइन कक्षा नेपाल भाषा अध्यापन याकूम्ह शिक्षक अनुपसिंह सुवालं रत्नराज्य क्याम्पसया तः दँया संघर्ष लिपा जक क्याम्पसय् नेपालभाषा हानं पलिस्था यायेत ताः लाःगु जुयाः नेपाल भाषा विषय ब्वनामिपिनिगिु चाहाना कथं एम.ए. तहलय् दुथ्याकेत क्याम्पस प्रमुखपाखें ग्वाहालि दइगु बिचाः तयादिल ।
गुरू पुन्हिया बारेय् चर्चा यासें पद्मकन्या क्याम्पसया प्रो. मदनसेन बज्राचार्यं क्याम्पसय् अध्यापन याकेत छुं नं विषयलय् १० म्ह ब्वनामिपिं मन्त धाःसा अध्यापन याके मज्यूगु सत्य मजूगुलि क्याम्पसया स्वविवेकं कक्षा सञ्चालन यायेफइगु न्ह्यथनादिल । क्याम्पस प्रमुख डा. जीवनधर ज्ञवाली अभियान्तापिंस नेपालभाषायात लजगाःलिसें स्वाकाः न्ह्यःने न्ह्याकल धाःसा जक क्याम्पसय् ब्वनामिपिनिगिु अभावं नेपालभाषा ब्वनामिपिं मदया आखः ब्वंकेगु अवस्थाया अन्त्य जुइगु धासें रत्नराज्य लक्ष्मी क्याम्पस पुर्ण रुपय् मानविकी क्याम्पस जूगुलिं न्ह्याबले फुक्कों भाषा संस्कृति मानव सभ्यतासितलिसें स्वापू विषय अध्ययन अध्यापन जुइगु खँ कनादिल ।
ज्याझ्वःइा सभाध्यक्ष रिदेन महर्जनं बि.ए. तहलय् जक मखु आः एम.ए. तहलय् नं नेपालभाषा अध्ययन याइपिं आपालं दुगुलिं अभियानय् सकल मातृभाषानुरागीपिसं ग्वाहालि मालाच्वंगु खँ न्ह्यथसें ज्याझ्वः क्वचायेका दिल । ज्याझ्वः युनियनया मू छयाञ्जे लिसें सकृय अभियन्ता प्रशान्त डंगोलं न्ह्याकादीगु खः ।
