लन्डनय् कन्चन अमात्ययात शाही सम्मानलिसें मानवता सेवा पुरस्कार
जाउलाख्यः छेँ जुयाः थौंकन्हय् अमेरिकाय् च्वनाच्वंम्ह नेवाः म्ह्याय् मचा कन्चन अमात्ययात लण्डनय् शाही सम्मानलिसें मानवता सेवा पुरस्कार लःल्हाःगु दु । वयात बेलायती शाही परिवारपाखें वं मानवता व सामाजिक ख्यलय् याःगु ज्याया मुल्यांकन यानाः उगु सिरपा लःल्हाःगु खः । उगु सिरपा कन्चन अमात्यया मां कृष्ण अमात्यं लःल्हाना काःगु खः ।
उगु सिरपा ड्युक अफ क्याम्ब्रिज प्रिन्स विलियम व डायनाया किजा लर्ड एर्ल स्पेन्सरं सःताः छगू ज्याझ्वः यानाः लःल्हाःगु खः । हलिंया बेलायत, क्यानाडा, मलेसिया, नाईजेरिया, तान्जेनिया, भारत आदि थीथी देशया नीम्ह मनूत ल्यःगुलिइ अमात्य नं छम्ह लाःगु खः । थुगु सिरपा बेलायती शाही परिवारपाखें बिइगु छगू उच्च सम्मान खः ।
