झिंनिम्ह थःथिति च्वनाः बाघौ दुने इहिपा
कोरोना भाइरसया कारणं लकडाउन जुयाच्वंगु हुनिं छगू नेवाः त्यपूया इहिपा थःथितिपिं १२ म्ह च्वनाः बाघौ दुने सकतां ज्याखँ क्वचायेकूगु दु । येँया श्रीघन डंगोल व क्रमिका महर्जनया इहिपा शुक्रवाः सुथय् थुकथं क्वचाःगु खः ।
न्यादँ न्ह्यःनिसें मतिना जूपिं थुपिं निम्हया इहिपा न्हापा हे क्वःछिना तःगु खः । पार्टी प्यालेसय् याये धकाः धयातःगु इहिपा लकडाउनं यानाः यक्व मनूत सःताः याये मछिंगुलिं थः थः जक च्वनाः देगलय् याःगु खः । बैसाखलिपा मेगु लगन तुरुन्त मदुगुलिं थःथः च्वनाः हे इहिपा सिधयेकूगु धाःगु दु । थुकिया लागि इमिसं वडा कार्यालयपाखें स्वीकृति काःगु खः । इहिपा ज्याझ्वलय् निगुलिं छेँयापिं यानाः मुक्कं १२ म्ह मनू मास्क तयाः ज्याखँ क्वचायेकूगु खः ।
