न्यूयोर्कय् कोरोना भाइरस संक्रमिततय् उपचार यानाच्वंम्ह दाग्दरं आत्महत्या यात
अमेरिकाय् कोरोनाया इपिसेन्टर माने यानातःगु न्यूयोर्कय् भाइरस संक्रमिततय् उपचार यानाच्वंम्ह छम्ह दाग्दर लोर्ना एम व्रिमं भर्जिनियाय् वनाः आत्महत्या याःगु दु । वया छेँजःपिन्सं ब्यूगु जानकारी कथं उम्ह ४९ दँ दुम्ह दाग्दर न्यूयोर्कया प्रेस्वेटरियन अस्पतालया आकस्मिक कक्षय् ज्या यानाच्वंम्ह खः ।
संक्रमिततय् उपचार यायेगु झ्वलय् थः नं संक्रमित जूम्ह व्रिमं भर्जिनियाय् थः मांबापिनिगु छेँय् वनाः आत्महत्या याःगु खः । थः कोरोना संक्रमण जुइधुंकाः संक्रमण जुया च्वंगु हे इलय् डेढ हप्ताय् हे ज्या लिहां वनेभाःगु खः । अस्पतालं वयात हानं छेँ लिव्छया हयेवं न्यूयोर्क त्वःताः थः मांबौया छेँय् आराम यानाच्वंगु खः । वं आइतवार आत्महत्याया कुतः याःगु जानकारी वयेवं हे प्रहरीं अस्पताल यंकूगु खः तर म्वाके धाःसा मफुत । वयाके न्हापा छुं नं कथंया मानसिक समस्या मदुगु धाःगु दु । वं थः मांबौपिन्त थःम्ह अस्पतालय् गुलितक ग्यानापुगु लु स्वयेमाःगु खँ कना च्वनीगु धाःगु दु ।
