फेसबुकय् आः ५० म्हतक भिडियो खँ ल्हाये फइगु

फेसबुकय् आः ५० म्हतक भिडियोय् खँ ल्हाये फइगु जूगु दु । फेसबुकया संस्थापक व सिइओ मार्क जकरवर्गं थौं शुक्रवाः फेसबुक लाइभ मार्फत थुगु खँया जानकारी ब्यूगु खः । फेसबुकं थुगु न्हूगु फिचरयात फेसबुक रुम्स धकाः नां ब्यूगु दु ।

थ्व स्वयां न्ह्यः फेसबुक म्यासेन्जरय् च्याम्हतक भिडियोय् खँ ल्हाये फइगु जुयाच्वंगु खः । फेसबुकया मेसेञ्जर रुम्सय् ५० म्हतक भिडियोय् खँ ल्हाये फइ धकाः धाःसां थथे ५० म्हतक भिडियोय् खँ ल्हायेत छुं ई पिइमालीगु धाःगु दु । मेरेन्जर रुम्सय् एडमिनं मनू लिकाये व तने फइगु, ख्वालय् थीथी मास्क तये फइगु आदि धाःगु दु । फेसबुक अकाउन्ट मदुपिन्सं नं रुम्स छ्यले फइगु धाःगु दु ।

कोरोना भाइरस संक्रमणया कारणं हलिंन्यंक हे प्रायः मनूत छेँय् च्वनाच्वंगु इलय् थवंथवय् सम्पर्क तयाच्वनेगु लागि भिडियो कन्फरेन्सिंग थ्वइलय् तसकं लोकंव्हाःगु दु । भिडियो कन्फरेन्सिंगु यायेगु सफ्टवेयर आय्‌प जूम छ्यलीपिं वंगु डिसेम्वरतक १ करोड दुगु खःसा आः जूम छ्यलीपिनिगु ल्याः ३० करोड थ्यंगु दु । अथे हे न्हियान्हिथं ७० करोड मनूतय्‌सं फेसबुक म्यासेन्जर व व्हाट्सआय्‌प छ्यला वयाच्वंगु दु । शेयर बजारय् जूमया भाः वंगु जनवरीनिसें म्हिगःतकया दुने १४६ प्रतिशत अप्वःगु खःसा थौं फेसबुकं मेसेञ्ज रुम पिकाःगु बुखँ लिपा जूमया भाः ६ प्रतिशत कुहांवःगु दु ।

More Stories Like this